អ្នកនាំពាក្យស្ថានទូតចិនប្រចាំសហរដ្ឋអាមេរិក លោក Liu Pengyu បានប្រាប់សារព័ត៌មាន TASS ថា ទីក្រុងប៉េកាំងរក្សាជំហរ «ស៊ីសង្វាក់គ្នា និងច្បាស់លាស់» ទាក់ទងនឹងស្ថានភាពនៅច្រកសមុទ្រហ័រមូស។

ដោយធ្វើអត្ថាធិប្បាយអំពីសេចក្តីថ្លែងការណ៍ថ្មីៗរបស់សេតវិមានដែលអះអាងជាពិសេសថា ប្រធានាធិបតីចិន លោក ស៊ី ជីនពីង (Xi Jinping) បានបញ្ជាក់យ៉ាងច្បាស់នៅក្នុងកិច្ចប្រជុំជាមួយមេដឹកនាំអាមេរិក លោក ដូណាល់ ត្រាំ (Donald Trump)ថា ទីក្រុងប៉េកាំងប្រឆាំងនឹងការដាក់ពង្រាយកម្លាំងយោធានៅច្រកសមុទ្រ និងការប៉ុនប៉ងណាមួយ ដើម្បីគិតថ្លៃសម្រាប់ការឆ្លងកាត់ច្រកនេះ លោក Liu បាននិយាយថា៖«ប្រមុខរដ្ឋទាំងពីរបានផ្លាស់ប្តូរទស្សនៈលើស្ថានភាពមជ្ឈិមបូព៌ា និងបញ្ហាអន្តរជាតិ និងតំបន់សំខាន់ៗផ្សេងទៀត។ ចំពោះច្រកសមុទ្រហ័រមូស ជំហររបស់ប្រទេសចិន គឺស៊ីសង្វាក់គ្នា និងច្បាស់លាស់»។

នៅថ្ងៃទី៨ ខែឧសភា អ្នកនាំពាក្យក្រសួងការបរទេសចិន លោក Lin Jian បាននិយាយនៅក្នុងសន្និសីទសារព័ត៌មានមួយថា ប្រទេសរបស់លោក បានសម្តែងការព្រួយបារម្ភយ៉ាងខ្លាំងទាក់ទងនឹងចំនួននាវា និងនាវិកមួយចំនួនធំដែលត្រូវបានរារាំងនៅក្នុងច្រកសមុទ្រហ័រមូស ដោយសារតែជម្លោះដែលកំពុងបន្ត។

យោងតាមលោក ប្រទេសចិនជឿជាក់ថា ការស្តារឡើងវិញនូវផ្លូវទឹកដែលគ្មានការរារាំងនេះ ឲ្យបានឆាប់រហ័ស ក៏ដូចជាការធានាសុវត្ថិភាពរបស់នាវាស៊ីវិល និងក្រុមនាវិករបស់ពួកគេ នឹងបំពេញតាម ផលប្រយោជន៍រួមរបស់ប្រទេសនានាក្នុងតំបន់ និងសហគមន៍អន្តរជាតិ។ លោកអ្នកការទូតបានជំរុញឲ្យ ភាគីពាក់ព័ន្ធងាកទៅរកវិធានការជាក់ស្តែង ដើម្បីទប់ស្កាត់ការកើនឡើងភាពតានតឹងបន្ថែមទៀតនៃស្ថានភាព នៅក្នុងច្រកសមុទ្រហ័រមូស៕