ប្រធានាធិបតីអាមេរិក លោក Donald Trump បាននិយាយថា លោកនឹងមិននៅ​មាន​ការ​អត់ធ្មត់ច្រើនទៀត​ទេជាមួយប្រទេស​អ៊ីរ៉ង់ ដោយលោកបានជំរុញឲ្យ​ទីក្រុងតេអេរ៉ង់ឈានដល់កិច្ចព្រមព្រៀងជាមួយទីក្រុងវ៉ាស៊ីនតោន ខណៈពេលដែលក៏បាន​លើក​ឡើង​ផងដែរថា កិច្ច​ប្រឹងប្រែង​យកសារធាតុ​អ៊ុយរ៉ានី​ញ៉ូមចម្រាញ់រួចហើយ​របស់អ៊ីរ៉ង់ គឺពាក់​ព័ន្ធ​នឹង​មុខ​មាត់​សាធារណៈច្រើនជាងសន្តិសុខ។

នៅក្នុងបទសម្ភាសន៍មួយដែលបានចាក់ផ្សាយកាលពី​យប់ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នៅលើកម្មវិធី Hannity របស់ប្រព័ន្ធផ្សព្វផ្សាយ​ Fox News លោក Trump បាននិយាយថា៖ «ខ្ញុំនឹងមិន​សល់ភាព​អត់ធ្មត់ច្រើនទៀត​ទេ។ ពួកគេគួរតែធ្វើកិច្ចព្រមព្រៀង»។

ហើយ​នៅពេលត្រូវបាន​សួរនៅក្នុងបទសម្ភាសន៍នោះ អំពីភាពចាំបាច់ក្នុងការយកសារធាតុ​អ៊ុយរ៉ានី​ញ៉ូមចម្រាញ់រួចហើយ ពីអ៊ីរ៉ង់ លោក Trump បានប្រាប់​ថា ដំណើរការនេះមិនមាន​ភាព​ចាំបាច់នោះ​ទេ លើកលែង​តែ​ពាក់ព័ន្ធ​នឹង​គោលបំណងទំនាក់ទំនងសាធារណៈ។

លោក Trump បានប្រាប់​នៅក្នុងបទសម្ភាសន៍នោះ​ថា៖ «ខ្ញុំមិនគិតថា វាមាន​ភាព​ចាំបាច់នោះ​ទេ លើកលែងតែពាក់​ព័ន្ធ​នឹង​ជំហរទំនាក់ទំនងសាធារណៈ។ ខ្ញុំគ្រាន់តែមានអារម្មណ៍ធូរស្រាលជាង ប្រសិនបើខ្ញុំទទួលបានវា។ ប៉ុន្តែខ្ញុំគិតថា វាគឺ​សម្រាប់ទំនាក់ទំនងសាធារណៈច្រើនជាងអ្វីផ្សេងទៀត»។

គួរ​បញ្ជាក់​ថា សហរដ្ឋអាមេរិក ដែលជាប្រទេសមួយក្នុងចំណោមប្រទេសចំនួន៩ នៅលើ​ពិភពលោក ដែលត្រូវបានគេទទួលស្គាល់ថា មានអាវុធនុយក្លេអ៊ែរ ទទូចថា អ៊ីរ៉ង់គួរតែប្តូរស្តុកសារធាតុ​អ៊ុយរ៉ានី​ញ៉ូមចម្រាញ់រួចហើយ​របស់ខ្លួនទៅក្រៅប្រទេស និងបោះបង់ចោលការចម្រាញ់ក្នុងស្រុក។ ទីក្រុងតេអេរ៉ង់ ដែលមិនមានអាវុធនុយក្លេអ៊ែរ បានបដិសេធមិន​បាន​ស្វែង​អាវុធទាំងនោះឡើយ​ ប៉ុន្តែ​បញ្ជាក់​ថា ខ្លួនមានសិទ្ធិអភិវឌ្ឍបច្ចេកវិទ្យានុយក្លេអ៊ែរ សម្រាប់គោលបំណងសន្តិភាព រួមទាំងការចម្រាញ់ផង​ដែរ​ ក្នុងនាមជាភាគីនៃសន្ធិសញ្ញាមិនរីកសាយភាយអាវុធនុយក្លេអ៊ែរ (Nuclear Non-Proliferation Treaty)៕