មេដឹកនាំប្រឆាំងអ៊ីស្រាអែល លោក Avigdor Lieberman បានព្រមានកាលពីថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) ថា នាយករដ្ឋមន្ត្រី លោក​ Benjamin Netanyahu អាចនឹងចាត់វិធានការយោធា «សម្រាប់គោលបំណងបោះឆ្នោត» ចំពេលមានរបាយការណ៍អំពីលទ្ធភាព​ដែល​អាច​មាន​ការរំលាយសភា Knesset។

នៅក្នុងសេចក្តីថ្លែងការណ៍ក្នុងអំឡុងពេលទស្សនកិច្ចរបស់លោកទៅកាន់កន្លែង​តាំងទីលំនៅតំបន់​ Be'eri ជិតតំបន់​ហ្កាហ្សា លោក Lieberman ដែល​ជា​អតីតរដ្ឋមន្ត្រីក្រសួងការពារជាតិ បាននិយាយថា លោកមិនប្រឆាំងនឹងការចាត់វិធានការយោធាណាមួយឡើយ «ប្រសិនបើចាំបាច់»។ តែ​លោកបានព្រមានថា លោក Netanyahu «អាចនឹងចាត់វិធានការយោធា មិនមែន​តែ​​ដើម្បីសម្រេចបាននូវជ័យជម្នះនោះ​ទេ ប៉ុន្តែសម្រាប់​គោលបំណងបោះឆ្នោតតែម៉្យាង​ប៉ុណ្ណោះ»។

ការព្រមានរបស់លោកបានកើតឡើង បន្ទាប់ពីមានការគំរាមកំហែងម្តងហើយម្តងទៀតដោយលោក Netanyahu «ក្នុង​ការ​ផ្លាស់ប្តូរមុខមាត់តំបន់​មជ្ឈិមបូព៌ា» និងដើម្បីធ្វើឲ្យ​អ៊ីស្រាអែលក្លាយជា «មហាអំណាច» ក្នុងតំបន់។

គួរបញ្ជាក់ថា ក្រុម​ចម្រុះ​កំពុង​កាន់អំណាចរបស់អ៊ីស្រាអែល បានដាក់ស្នើសេចក្តីព្រាងច្បាប់មួយកាលពី​ល្ងាចថ្ងៃពុធ ដើម្បីរំលាយសភា Knesset ស្រប​ពេលមានវិបត្តិការកេណ្ឌទាហាន ជាចំណាត់ការ​មួយដែលត្រូវបានគេមើលឃើញថា ជាការប៉ុនប៉ងរារាំងជំហានស្រដៀងគ្នានេះពីគណបក្សប្រឆាំង។ ការបោះឆ្នោតសកល ត្រូវបានគ្រោងនឹងធ្វើឡើងនៅខែតុលា៕