ការចុះផ្សាយរបស់ប្រព័ន្ធផ្សព្វផ្សាយ NHK នៅថ្ងៃសុក្រ (ទី១៥ ខែឧសភា ឆ្នាំ២០២៦) នេះ បានឲ្យដឹងថា ក្រសួងការពារជាតិជប៉ុនកំពុងពិចារណានាំចេញមីស៊ីលបាញ់ពីលើគោកទៅនាវា ទៅកាន់ប្រទេសហ្វីលីពីន ខណៈដែលទីក្រុងតូក្យូបានអនុម័តតួនាទីសន្តិសុខក្នុងតំបន់ខ្លាំងក្លាជាងមុន ស្របពេលមានក្ដីបារម្ភ អំពីឥទ្ធិពលរបស់ចិន។

កាលពីខែមេសា ប្រទេសជប៉ុនបានបង្ហាញពីការរុះរើច្បាប់នាំចេញការពារជាតិដ៏ធំបំផុតរបស់ខ្លួន ក្នុងរយៈពេលជាច្រើនទសវត្សរ៍ ដោយលុបចោលការរឹតបន្តឹងលើការលក់អាវុធទៅក្រៅប្រទេស និងបើកផ្លូវឲ្យមានការនាំចេញនាវាចម្បាំង មីស៊ីល និងអាវុធផ្សេងទៀត។

ទីក្រុងប៉េកាំងបានសម្តែងការមិនពេញចិត្ត ចំពោះកិច្ចខិតខំប្រឹងប្រែងថ្មីរបស់ទីក្រុងតូក្យូ ក្នុងវិស័យការពារជាតិ ដោយទំនាក់ទំនងទ្វេភាគី ស្ថិតក្នុងស្ថានភាពធ្លាក់ចុះទាបជាពិសេស ចាប់តាំងពីនាយករដ្ឋមន្ត្រី លោកស្រី Sanae Takaichi បានលើកឡើងកាលពីខែវិច្ឆិកាឆ្នាំមុនថា ការវាយប្រហាររបស់ចិន លើកោះតៃវ៉ាន់ ដែលគំរាមកំហែងដល់ការរស់រានមានជីវិតរបស់ជប៉ុន អាចបង្កឲ្យមានការឆ្លើយតបខាងយោធា។

ក្រសួងការពារជាតិជប៉ុន មិនបានធ្វើអត្ថាធិប្បាយភ្លាមៗនោះឡើយ ជុំវិញរបាយការណ៍ អំពីការនាំចេញមីស៊ីលនេះ។ ចំណែកអ្នកនាំពាក្យក្រសួងការពារជាតិហ្វីលីពីន បានកត់សម្គាល់ថា ប្រទេសទាំង២ បានព្រមព្រៀងគ្នាពិភាក្សា អំពីការលក់ធនធានការពារជាតិ៕