នាយករដ្ឋមន្ត្រីជប៉ុន លោកស្រី Sanae Takaichi នឹងទៅទស្សនកិច្ចប្រទេសកូរ៉េខាងត្បូង នាសប្តាហ៍ក្រោយ សម្រាប់កិច្ចប្រជុំកំពូលជាមួយប្រធានាធិបតីកូរ៉េខាងត្បូង លោក Lee Jae Myung។

ដោយយោងតាមការិយាល័យប្រធានាធិបតី ទីភ្នាក់ងារសារព័ត៌មាន Yonhap បានរាយការណ៍ថា ក្នុងអំឡុងពេលទស្សនកិច្ចរយៈពេល ២ថ្ងៃ ទៅកាន់ទីក្រុង Andong ដែលចាប់ផ្តើមនៅថ្ងៃអង្គារ មេដឹកនាំទាំង២ នឹងធ្វើកិច្ចពិភាក្សាជំនួបកំពូល ចេញសេចក្តីថ្លែងការណ៍សារព័ត៌មានរួម និងចូលរួមពិធីលៀងសាយភោជន និងព្រឹត្តិការណ៍មិត្តភាពផ្សេងៗទៀត។

ដំណើរទស្សនកិច្ចនេះ គឺជាផ្នែកមួយនៃ «ការទូតត្រល់ ឬការទូតទៅមក» រវាងប្រទេសជិតខាងទាំង២ និងធ្វើតាមការអញ្ជើញពីមុនដោយលោក Lee។ មេដឹកនាំទាំង២ បានជួបគ្នាលើកចុងក្រោយ ក្នុងខែមករា នៅពេលដែលលោក Lee បានទៅទស្សនកិច្ចខេត្ត Nara របស់ជប៉ុន ដែលជាស្រុកកំណើតរបស់លោកស្រី Takaichi។

ការពិភាក្សាជំនួបកំពូលទ្វេភាគី ត្រូវបានគេរំពឹងថា នឹងផ្តោតលើទិសដៅនៃទំនាក់ទំនង និងពង្រឹងកិច្ចសហប្រតិបត្តិការ ក្នុងវិស័យផ្សេងៗ រួមទាំងសេដ្ឋកិច្ច និងការការពារឲ្យកាន់តែប្រសើរឡើង សម្រាប់អ្នកទេសចរនៃប្រទេសទាំង២។ ហើយជាងនេះទៀត ជម្លោះ នៅតំបន់មជ្ឈិមបូព៌ា និងបញ្ហាសកលសំខាន់ៗផ្សេងទៀតក៏នឹងស្ថិតនៅក្នុងរបៀបវារៈសំខាន់ផងដែរ។

ការិយាល័យប្រធានាធិបតីបានឲ្យដឹងថា កិច្ចប្រជុំកំពូលនេះត្រូវបានគេរំពឹងថា នឹងធ្វើឲ្យកាន់តែស៊ីជម្រៅនូវ «សាមគ្គីភាព និងការជឿទុកចិត្តគ្នាយ៉ាងរឹងមាំ» រវាងមេដឹកនាំទាំង២ និងបម្រើជាឱកាសមួយ ដើម្បីពង្រឹងមូលដ្ឋានគ្រឹះ សម្រាប់ការអភិវឌ្ឍនាពេលអនាគតនៃទំនាក់ទំនងសេអ៊ូល-តូក្យូ៕