ដោយសារផលប៉ះពាល់ពី​ជម្លោះនៅតំបន់​មជ្ឈិមបូព៌ា លើ​ការផ្គត់ផ្គង់ថាមពល ប្រទេស​ឥណ្ឌា នៅថ្ងៃសុក្រ (ទី១៥ ខែឧសភា ឆ្នាំ២០២៦) នេះ បានប្រកាសពីការដំឡើងថ្លៃប្រេងឥន្ធនៈជា​លើកដំបូង ក្នុងរយៈពេលជាង ៤ឆ្នាំ។

ប្រព័ន្ធ​ផ្សព្វផ្សាយ All India Radio នៅ​ថ្ងៃសុក្រនេះ បាន​រាយការណ៍​ថា តម្លៃប្រេងសាំងត្រូវបានដំឡើងថ្លៃ ៣រូពី (៣សេន) ដែលនាំឲ្យ​តម្លៃឡើងដល់ ៩៧,៧៧រូពី (១,២ដុល្លារ) ក្នុង ១លីត្រ ហើយ​ប្រេងម៉ាស៊ូតឡើង ៩០,៦៧រូបី (០,៩៥ដុល្លារ) ក្នុង ១លីត្រ នៅទីក្រុងញូវដេលី។

ការឡើងថ្លៃនេះ ដែល​បន្ទាប់ពីមិនមានការដំឡើងថ្លៃចាប់តាំងពីខែមេសា ឆ្នាំ២០២២ មក បានកើតឡើងប៉ុន្មានថ្ងៃបន្ទាប់ពីមន្ត្រីជាន់ខ្ពស់ឥណ្ឌាមួយ​រូប​ បាននិយាយថា ក្រុមហ៊ុនប្រេងឥណ្ឌា កំពុងប្រឈមនឹងការខាតបង់យ៉ាងធ្ងន់ធ្ងរ ដោយសារតែផលរំខាន​ភ្លាម​ៗលើថាមពល នៅតំបន់​មជ្ឈិមបូព៌ា។

មន្ត្រីជាច្រើន​បានលើកឡើង​ថា ក្រុមហ៊ុនទីផ្សារប្រេងរបស់ឥណ្ឌា បានរង​ការខាតបង់ជិត ១០ពាន់លាន​រូពី (១០៤,៥លានដុល្លារ) ក្នុង ១ថ្ងៃ ដូច្នេះ «បន្ទុកតម្លៃសកលដ៏ខ្ពស់ មិនត្រូវបានទម្លាក់​ទៅលើ​ពលរដ្ឋឥណ្ឌាឡើយ​»។

ឥណ្ឌាទិញស្ទើរតែ ៥០​ភាគរយ​នៃការផ្គត់ផ្គង់ថាមពលរបស់ខ្លួន ពីតំបន់​មជ្ឈិមបូព៌ា ដែលមានតម្លៃ ១៨០ពាន់លានដុល្លារ នៅឆ្នាំ២០២៤។ កាលពីខែមុន ឥណ្ឌាបានប្រកាសថា ខ្លួនបានចាប់ផ្ដើម​ទិញប្រេងពីអ៊ីរ៉ង់ឡើង​វិញ​ជាលើកដំបូង ក្នុងរយៈពេល ៧ឆ្នាំ ដោយសារ​ជម្លោះកំពុងបន្តមាន​នៅតំបន់​មជ្ឈិមបូព៌ា ដែលបានចាប់ផ្តើមកាល​ពី​ថ្ងៃទី២៨ ខែកុម្ភៈ៕