ទោះបីជាមានការចរចាសន្តិភាពក៏ដោយ ជម្លោះដែលអូសបន្លាយនៅភាគខាងកើតសាធារណរដ្ឋប្រជាធិបតេយ្យកុងហ្គោ បានឈានដល់ដំណា​ក់​កាលថ្មីដ៏គ្រោះថ្នាក់មួយ ដោយជនស៊ីវិលឥឡូវនេះត្រូវបានវាយប្រហារពីលើអាកាសដោយយានដ្រូន​ឆ្ងាយពីខ្សែត្រៀមជួរមុខ។

តំបន់នេះ ត្រូវបានញាំញីដោយអំពើហិង្សាអស់រយៈពេលជាង ៣០ឆ្នាំមកហើយ ប៉ុន្តែការប្រយុទ្ធគ្នាកាន់តែខ្លាំងឡើង នៅដើមឆ្នាំ ២០២៥ នៅពេលដែលក្រុម​យុទ្ធជន M23 ដែលគាំទ្រដោយប្រទេស​រ្វ៉ាន់ដា​ បាន   ដណ្តើមយកទីក្រុងសំខាន់ៗ ដូចជា Goma និង Bukavu ដោយ​​វាយប្រហាររុញច្រាន​​​​កងកម្លាំងកុងហ្គោ។

កាលពីសប្តាហ៍មុន ការវាយប្រហារដោយដ្រូន​ បានបណ្តាលឲ្យ​ជនស៊ីវិលយ៉ាងហោចណាស់ ២៥​នាក់ រងរបួស នៅក្នុង​តំបន់ Mushaki ជាតំបន់កសិកម្មមួយដែលមានចម្ងាយប្រហែល ៤០​ គីឡូម៉ែត្រ ពីទីក្រុង Goma ដែលឥឡូវនេះ ស្ថិតនៅក្រោមការគ្រប់គ្រងរបស់ក្រុមឧទ្ទាម​ M23។ នេះបើយោងតាមប្រភពមនុស្សធម៌។

អ្នករងរបួស ដែលរួមមានក្មេងស្រីអាយុពីរឆ្នាំម្នាក់ ត្រូវបានបញ្ជូនទៅមន្ទីរពេទ្យ Ndosho ក្នុងទីក្រុងនេះ ដោយមានការគាំទ្រពីគណៈកម្មាធិការកាកបាទក្រហមអន្តរជាតិ៕