តម្លៃប្រេងបានហក់ឡើងជាង ៣ភាគរយ នៅថ្ងៃសុក្រ (ទី១៥ ខែឧសភា ឆ្នាំ២០២៦) នេះ បន្ទាប់ពីប្រធានាធិបតីអាមេរិក លោក Donald Trump បាននិយាយថា ការអត់ធ្មត់របស់លោកជាមួយអ៊ីរ៉ង់ កំពុងកាន់តែអស់ទៅៗហើយ ជាសម្ដីដែលបន្ថែមក្ដីបារម្ភ អំពីកង្វះវឌ្ឍនភាព លើកិច្ចព្រមព្រៀងសន្តិភាព ដើម្បីបញ្ចប់ការវាយប្រហារ លើនាវា និងការរឹបអូស នៅជុំវិញច្រកសមុទ្រ Hormuz។

ហ៊ុនប្រេងឆៅ Brent បានឡើងថ្លៃ ៣,៤៧ដុល្លារ ឬ ៣,៣ភាគរយ ដោយឡើងដល់ ១០៩,១៩ដុល្លារ ក្នុងមួយបារ៉ែល គិតត្រឹមម៉ោង ៩:២៥ ម៉ោងសកល។ ចំណែកហ៊ុនប្រេងឆៅ West Texas Intermediate (WTI) របស់សហរដ្ឋអាមេរិក បានឡើងថ្លៃ ៣,៧២ដុល្លារ ឬ ៣,៧ភាគរយ ដោយឡើងដល់ ១០៤,៨៩ដុល្លារ។

ក្នុងរយៈពេលមួយសប្តាហ៍នេះ ប្រេងឆៅ Brent បានកើនឡើង ៧,៨ភាគរយ ហើយ WTI ឡើង ៩,៩ភាគរយ ដោយសារតែភាពមិនប្រាកដប្រជា ជុំវិញបទឈប់បាញ់ដ៏រង្គោះរង្គើ នៅក្នុងជម្លោះអ៊ីរ៉ង់។

បន្ទាប់ពីមានកិច្ចពិភាក្សាជាមួយប្រធានាធិបតីចិន លោក Xi Jinping លោក Trump បាននិយាយថា ពួកលោកបានឯកភាពគ្នាថា អ៊ីរ៉ង់មិនអាចឲ្យមានអាវុធនុយក្លេអ៊ែរបានឡើយ ហើយត្រូវតែបើកច្រកសមុទ្រឡើងវិញ ដោយបន្ថែមថា លោកកំពុងអស់ការអត់ធ្មត់ជាមួយទីក្រុងតេអេរ៉ង់ហើយ៕