មន្ត្រីជាន់ខ្ពស់អ៊ុយក្រែនមួយ​រូប​បាននិយាយនៅ​ថ្ងៃសុក្រ (ទី១៥ ខែឧសភា ឆ្នាំ២០២៦) ថា រុស្ស៊ីមានសមត្ថភាពចាប់ផ្តើមការវាយប្រហារនុយក្លេអ៊ែរ «នៅពេលណាក៏បាន» ប៉ុន្តែបរ្រទេស​អ៊ុយក្រែនមិនបានឃើញសញ្ញាណាដែលទីក្រុងមូស្គូកំពុងរៀបចំការវាយប្រហារបែបនេះឡើយ​។

នៅក្នុងបទសម្ភាសន៍ជាមួយសារព័ត៌មាន The Times ប្រធានការិយាល័យប្រធានាធិបតីអ៊ុយក្រែន លោក Kyrylo Budanov បាននិយាយថា ឃ្លាំងអាវុធនុយក្លេអ៊ែររបស់រុស្ស៊ីផ្តល់ឲ្យ​ប្រទេស​នេះ​នូវសមត្ថភាពបច្ចេកទេស ក្នុងការធ្វើ​ការវាយប្រហារនុយក្លេអ៊ែរ ប៉ុន្តែបានបញ្ជាក់​ថា បញ្ហានេះអាស្រ័យលើឆន្ទៈនយោបាយរបស់ទីក្រុងមូស្គូ។

លោក Budanov បាននិយាយ​ថា៖ «រុស្ស៊ីពិតជាមានសមត្ថភាពធ្វើ​ការវាយប្រហារនុយក្លេអ៊ែរ នៅពេលណាក៏បាន និងនៅចម្ងាយណាមួយ​។ សមត្ថភាពនុយក្លេអ៊ែររបស់ខ្លួន​អាច​ឲ្យ​ប្រទេស​នេះ​សម្រេចបានភារកិច្ចបែបនេះ។ ប៉ុន្តែជាដំបូង និងសំខាន់បំផុត នេះ​គឺជាបញ្ហាឆន្ទៈនយោបាយ"។

យ៉ាង​ណាក្ដី លោកបានបន្ថែមថា៖ «ខ្ញុំមិនបានឃើញការចង្អុល​បង្ហាញ​ណាមួយពី​ការរៀបចំ សម្រាប់ការវាយប្រហារនុយក្លេអ៊ែរនោះ​ទេ។ ប្រសិនបើមាន ខ្ញុំនឹងដឹង»។

ជាមួយ​គ្នានេះ លោក Budanov ក៏បាននិយាយផងដែរថា រុស្ស៊ីហាក់ដូចជាត្រៀមខ្លួនរួចជាស្រេច ដើម្បីអនុវត្តការគំរាមកំហែងថ្មីៗរបស់ខ្លួន ពាក់​ព័ន្ធ​នឹង​ការវាយប្រហារទ្រង់ទ្រាយធំ នៅ​កណ្តាលទីក្រុងគីវ បន្ទាប់ពីវិមានក្រឹមឡាំងបានព្រមានប្រទេសលោកខាងលិចឲ្យ​ជម្លៀសស្ថានទូតរបស់ពួកគេ និងបានលើកឡើង​ថា មីស៊ីល Oreshnik ដែលមានសមត្ថភាពបំពាក់ក្បាល​​គ្រាប់​នុយក្លេអ៊ែររបស់ខ្លួន អាចត្រូវបានប្រើប្រាស់​៕