រដ្ឋមន្ត្រី​ទទួលបន្ទុក​កងកម្លាំងប្រដាប់អាវុធ​របស់ប្រទេស​​បារាំង ​បាន​និយាយ​នៅ​​ថ្ងៃសុក្រ (ទី១៥ ខែឧសភា ឆ្នាំ២០២៦) នេះ​​ថា នាវា​ផ្ទុក​យន្តហោះ Charles de Gaulle របស់​បារាំង ​នឹងទៅ​ដល់​ជិត​ច្រក​សមុទ្រ Hormuz ក្នុងពេល​ឆាប់ៗ​នេះ ស្រប​ពេល​មាន​ភាព​តានតឹង​កើនឡើង​ នៅ​តំបន់​ឈូងសមុទ្រ។

លោកស្រី Alice Rufo បាន​ប្រាប់​ប្រព័ន្ធផ្សព្វផ្សាយ​​បារាំង BFMTV ថា នាវា​ផ្ទុក​យន្តហោះ​ Charles de Gaulle របស់​បារាំង កំពុង «ធ្វើ​ដំណើរ​ចូល​​​ទៅក្នុង​​​សមុទ្រ​អារ៉ាប់» ហើយ​កំពុង «ស្ថិត​នៅ​ក្នុង​តំបន់​នោះ»។ លោកស្រី Rufo បាន​និយាយ​ដោយ​សំដៅ​ទៅលើ​នាវា​ផ្ទុក​យន្តហោះ​បារាំង​ថា «វា​កំពុងចល័ត​ចូល​ទៅ​ក្នុង​សមុទ្រ​អារ៉ាប់ ហើយ​វា​ស្ថិត​នៅ​ក្នុង​តំបន់​នោះ»។

គួរបញ្ជាក់​ថា ភាព​តានតឹង​ក្នុង​តំបន់​បាន​កើនឡើង​ ចាប់តាំងពី​សហរដ្ឋអាមេរិក និង​អ៊ីស្រាអែល ​បាន​បើក​ការវាយប្រហារ​ លើ​អ៊ីរ៉ង់​កាលពី​ថ្ងៃទី២៨ ខែកុម្ភៈ ដែល​នាំ​ឲ្យ​មាន​ការ​សងសឹក​ពី​ទីក្រុង​តេអេរ៉ង់ ប្រឆាំង​នឹង​អ៊ីស្រាអែល ក៏ដូចជា​សម្ព័ន្ធមិត្ត​របស់​សហរដ្ឋអាមេរិក ​នៅ​ក្នុង​ឈូងសមុទ្រ រួម​ជាមួយ​នឹង​ការ​បិទ​ច្រក​សមុទ្រ Hormuz ផង​ដែរ​។

បទឈប់បាញ់​មួយ​បាន​ចូល​ជា​ធរមាន​នៅ​ថ្ងៃទី៨ ខែមេសា តាមរយៈ​ការសម្របសម្រួល​របស់​ប៉ាគីស្ថាន ប៉ុន្តែ​ការចរចា​នៅ​ទីក្រុង​អ៊ីស្លាម៉ាបាដ​ បាន​បរាជ័យ​ក្នុង​ការ​បង្កើត​បាន​នូវ​កិច្ចព្រមព្រៀង​យូរអង្វែង។ ក្រោយមក បទឈប់បាញ់​នេះ​ត្រូវ​បាន​ពង្រីកបន្ថែម​​ដោយ​ប្រធានាធិបតី​អាមេរិក លោក​ Donald Trump ​ដោយ​គ្មាន​កាលកំណត់​៕