លោកប្រធានាធិបតី Donald Trump បាននិយាយនៅថ្ងៃសុក្រ (ទី១៥ ខែឧសភា ឆ្នាំ២០២៦) នេះថា លោកបានពិភាក្សា អំពីការលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់ជាមួយប្រធានាធិបតីចិន លោក Xi Jinping ក្នុងអំឡុងកិច្ចចរចា នៅទីក្រុងប៉េកាំង ហើយបានបញ្ជាក់ថា លោកនឹងធ្វើការសម្រេចចិត្ត លើបញ្ហានេះ ក្នុងពេលឆាប់ៗនេះ ដោយនេះបានបង្ហាញនូវចំណុចក្តៅមួយ នៅក្នុងទំនាក់ទំនង រវាងទីក្រុងវ៉ាស៊ីងតោន និងប៉េកាំង។

អំឡុងពេលថ្លែងទៅកាន់អ្នកសារព័ត៌មាននៅលើយន្តហោះ Air Force One ពេលលោកត្រឡប់មកពីប្រទេសចិនវិញ លោក Trump បាននិយាយថា លោក និងលោក Xi «បាននិយាយច្រើន អំពីបញ្ហាតៃវ៉ាន់» ប៉ុន្តែបានបន្ថែមថា លោកមិនជឿថា មានជម្លោះលើបញ្ហានេះទេ។ លោកបានឲ្យដឹងទៀតថា លោកមិនបានប្តេជ្ញាចិត្ត ចំពោះលោក Xi ទាក់ទងនឹងកោះតៃវ៉ាន់ឡើយ។

ជាមួយគ្នានេះ លោក Trump ក៏បានលើកឡើងផងដែរថា លោក Xi បានសួរដោយផ្ទាល់ថា តើសហរដ្ឋអាមេរិកនឹងការពារកោះតៃវ៉ាន់ដែរ ឬទេ ប្រសិនបើចិនវាយប្រហារកោះនេះ ប៉ុន្តែលោកបានបដិសេធមិនឆ្លើយ។

លោក Trump បានបន្ថែមថា៖ «មានតែមនុស្សម្នាក់ទេដែលដឹងរឿងនោះ ហើយអ្នកនោះ គឺជាខ្ញុំ។ ខ្ញុំជាមនុស្សតែម្នាក់គត់។ សំណួរនោះត្រូវបានសួរមកខ្ញុំនៅថ្ងៃនេះ ដោយលោកប្រធានាធិបតី Xi។ ខ្ញុំបាននិយាយថា ខ្ញុំមិននិយាយអំពីរឿងនោះទេ»។

គួរបញ្ជាក់ថា ប្រទេសចិនអះអាងថា កោះតៃវ៉ាន់គឺជាទឹកដីរបស់ខ្លួន ហើយបានជំទាស់ជាយូរមកហើយ ចំពោះការលក់អាវុធរបស់អាមេរិកទៅកោះនេះ ដែលទីក្រុងប៉េកាំងមើលឃើញថា ជាការជ្រៀតជ្រែកក្នុងកិច្ចការផ្ទៃក្នុងរបស់ខ្លួន។ សហរដ្ឋអាមេរិក ទោះបីជាមិនមានចំណងការទូតជាផ្លូវការជាមួយតៃវ៉ាន់ក៏ដោយ ក៏នៅតែជាអ្នកគាំទ្រអន្តរជាតិដ៏សំខាន់បំផុត និងជាអ្នកផ្គត់ផ្គង់អាវុធធំជាងគេរបស់កោះនេះ៕