រដ្ឋមន្រ្តីក្រសួងការបរទេសប៉េរូលោក Carlos Pareja បាននិយាយថា លោកមានការព្រួយបារម្ភជាខ្លាំងចំពោះជនរួមជាតិរបស់លោកដែលគ្រួសាររបស់ពួកគេនិយាយថា ត្រូវបានពួកមេខ្លោងអូសទាញការងារខុសច្បាប់សន្យាថា ពួកគេនឹងទទួលបានការងារល្អនៅប្រទេសរុស្ស៊ី តែបែរជាត្រូវបានបញ្ជូលឲ្យទៅធ្វើសង្រ្គាមនៅអ៊ុយក្រែនទៅវិញ ។

សាច់ញាតិកម្មករចំណាកស្រុកទៅកាន់ប្រទេសរុស្ស៊ី នាំគ្នាតវ៉ានៅក្រៅអគារក្រសួងការបរទេសប៉េរូ ស្ថិតក្នុងរដ្ឋធាន Lima ដោយពួកគេនិយាយថា សមាជិកគ្រួសាររបស់ពួកគេបានក្លាយជាជនរងគ្រោះនៃការជួញដូរមនុស្សខុសច្បាប់ ។

លោក Pareja បានព្រមានថា ក្រុមយុវជនប៉េរូ មិនត្រូវចាញ់បោកការអូសទាញរបស់ក្រុមមេខ្លោងជួញដូរមនុស្សខុសច្បាប់នោះឡើយ ពីព្រោះថា ពួកគេអាចនឹងបញ្ចប់ដោយការបញ្ជូនទៅជួរមុខ ធ្វើសង្រ្គាមក្នុងប្រទេសអ៊ុយក្រែន ។

ក្រសួងការបរទេសប៉េរូ បានចុះយុទ្ធនាការមួយតាមបណ្តាញព័ត៌មានសង្គម ដើម្បីព្រមានពលរដ្ឋពីការផ្តល់ជូនការងារទទួលបានអត្ថប្រយោជន៍ខ្ពស់ ឬការសិក្សានៅប្រទេសរុស្ស៊ី ដោយណែនាំឲ្យពួកគេស្នើសុំកិច្ចសន្យា មិនមែនគ្រាន់តែចុះហត្ថលេខាជាភាសាបរទេសដែលពួកគេមិនដឹងនោះទេ ហើយមិនត្រូវប្រគល់លិខិតឆ្លងដែនរបស់ពួកគេជាដាច់ខាត ។

អ្នកស្រី Angie Mendoza គឺជាមេធាវីសាច់ញាតិប៉េរូនៅប្រទេសរុស្ស៊ី និយាយថា មាននូវពលរដ្ឋប៉េរូចន្លោះ ៦០០នាក់ និង ៩០០នាក់ កំពុងនៅរស់នៅប្រទេសរុស្ស៊ី ៕