រដ្ឋមន្ត្រីយុត្តិធម៌ហ្វីលីពីន បាននិយាយនៅ​ថ្ងៃសុក្រ (ទី១៥ ខែឧសភា ឆ្នាំ២០២៦) នេះថា ប្រទេសរបស់​លោក​នឹង «ពិតជា» យល់​ព្រម​អនុវត្ត​តាម​ការ​ស្នើ​របស់​តុលាការព្រហ្មទណ្ឌអន្តរជាតិ (ICC) ដើម្បីចាប់ខ្លួនសមាជិកព្រឹទ្ធសភាជាន់ខ្ពស់​មួយ​រូប​ដែល​​ត្រូវបាន​ត្រូវ​ការ​ខ្លួន​ ពាក់​ព័ន្ធ​នឹង​ការ​ចោទប្រកាន់​បទ​ឧក្រិដ្ឋកម្មប្រឆាំងមនុស្សជាតិ ក្នុងអំឡុងពេលដែលរូប​លោក​មាន​តួនាទី​នៅ​យុទ្ធ​នាការ​ធ្វើ​ «សង្គ្រាមប្រឆាំងគ្រឿងញៀន» ដ៏​បង្ហូរឈាម។

រដ្ឋមន្ត្រីយុត្តិធម៌ លោក​ Fredderick Vida បាននិយាយថា ដីកាចាប់ខ្លួនលោក Ronald «Bato» dela Rosa ជា​អតីត​មេ​នគរបាល​ដែលបានត្រួតពិនិត្យការបង្ក្រាបប្រឆាំងគ្រឿងញៀនរបស់អតីតប្រធានាធិបតី លោក​ Rodrigo Duterte គឺមានសុពលភាព ហើយប្រទេស​ហ្វីលីពីនបានទទួលសំណើឲ្យ​អនុវត្តតាម​។

កាលពីថ្ងៃចន្ទដើម​សប្ដាហ៍​នេះ​ ICC បានបង្ហាញដីកាចាប់ខ្លួនលោក dela Rosa ជា​ដីកាដែលមាន​​តាំង​ពី​​ខែវិច្ឆិកា​ឆ្នាំមុន​។ លោក Dela Rosa បានទៅ​ស្នាក់​​នៅក្នុង​ព្រឹទ្ធសភា ប៉ុន្តែបានចាកចេញ​មុនថ្ងៃរះ កាលពី​ថ្ងៃព្រហស្បតិ៍ ជា​អ្វីដែលភរិយារបស់លោក​ចាត់ទុក​ថា ជា​ «ការរត់គេចខ្លួន»។ ទីតាំងបច្ចុប្បន្នរបស់លោក​មិនទាន់ត្រូវបាន​គេ​ដឹងនៅឡើយទេ។ លោក Vida បានបញ្ជាក់​ប្រាប់អ្នកសារព័ត៌មាននៅ​ថ្ងៃសុក្រនេះ​ថា «យើងពិតជានឹងព្រម​អនុវត្ត​តាម​សំណើរបស់ ICC មែន​»។

អតីតប្រធានាធិបតី លោក​ Duterte បច្ចុប្បន្នកំពុងជាប់ឃុំឃាំងនៅ ICC បន្ទាប់ពីត្រូវបាន​ចាប់ខ្លួន កាលពីឆ្នាំមុន ហើយត្រូវបានគេរំពឹងថា នឹងក្លាយជាអតីតប្រមុខរដ្ឋអាស៊ីដំបូងគេ ដែលត្រូវបានកាត់ទោសនៅទីក្រុងឡាអេ (ប្រទេសហូឡង់)។ លោកត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ប៉ុន្តែលោក​បានបដិសេធកាមិន​បាន​ប្រព្រឹត្តអ្វីខុសឡើយ»។

សម្រាប់​លោក Dela Rosa លោក​បានដាក់ពាក្យបណ្តឹងបន្ទាន់ទៅកាន់តុលាការកំពូលរបស់​ប្រទេស​ ដោយអះអាងថា ICC គ្មានយុត្តាធិការនោះ​ទេ បន្ទាប់ពីហ្វីលីពីនបាន​ដក​ខ្លួន​ចេញពីលក្ខន្តិកៈទីក្រុងរ៉ូម (Rome Statute) ក្នុងឆ្នាំ២០២១៩។ ហើយ​លោកបដិសេធមិន​បាន​ជាប់ពាក់ព័ន្ធនឹងការសម្លាប់ខុសច្បាប់ឡើយ​៕