ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ទី១៥ ខែឧសភា ថា ភាពអត់ធ្មត់របស់លោកជាមួយអ៊ីរ៉ង់អស់ហើយ ហើយប្រធានាធិបតីចិន លោក Xi Jinping បានព្រមព្រៀងថា ទីក្រុងតេអេរ៉ង់ត្រូវតែបើកឡើងវិញច្រកសមុទ្រ Hormuz ប៉ុន្តែប្រទេសចិន ពុំបានផ្តល់ការបញ្ជាក់ថាខ្លួននឹងចូលរួមនោះទេ។

ខណៈលោកវិលត្រឡប់មកពីទីក្រុងប៉េកាំងវិញកាលពីថ្ងៃសុក្រ បន្ទាប់ពីកិច្ចពិភាក្សារយៈពេលពីរថ្ងៃជាមួយលោក Xi លោកTrump បាននិយាយថា លោកកំពុងពិចារណាថាតើត្រូវដកទណ្ឌកម្មរបស់សហរដ្ឋអាមេរិកលើក្រុមហ៊ុនប្រេងចិនដែលទិញប្រេងអ៊ីរ៉ង់ ឬយ៉ាងណា។ ប្រទេសចិន គឺជាអ្នកទិញប្រេងអ៊ីរ៉ង់ច្រើនបំផុត។

ការលើកឡើងរបស់លោក ពុំបានបង្ហាញពីពន្លឺ ថាតើទីក្រុងប៉េកាំងអាចប្រើប្រាស់ឥទ្ធិពលរបស់ខ្លួនជាមួយទីក្រុងតេអេរ៉ង់ដើម្បីបញ្ចប់ជម្លោះដែលខ្លួននិយាយថាមិនគួរចាប់ផ្តើមនោះទេ។ លោក Trump បាននិយាយនៅពេលលោកត្រូវបានសួរដោយក្រុមអ្នកសារព័ត៌មាននៅលើយន្តហោះថាតើលោក Xi បានធ្វើការប្តេជ្ញាចិត្តយ៉ាងម៉ឺងម៉ាត់ក្នុងការដាក់សម្ពាធលើអ៊ីរ៉ង់ឱ្យបើកច្រកសមុទ្រឡើងវិញ ដែលជាផ្លូវទឹកសំខាន់សម្រាប់ការដឹកជញ្ជូនប្រេងដែរឬយ៉ាងណា នោះលោកបានឆ្លើយថា «ខ្ញុំមិនបានស្នើសុំការគាំទ្រាណាមួយនោះទេ ព្រោះថា នៅពេលអ្នកស្នើសុំការគាំទ្រ អ្នកត្រូវគាំទ្រជាថ្នូរវិញ»។

លោក Xi មិនបានធ្វើអត្ថាធិប្បាយលើការពិភាក្សារបស់លោកជាមួយលោក Trump អំពីអ៊ីរ៉ង់ទេ ទោះបីជាក្រសួងការបរទេសចិន បានចេញសេចក្តីថ្លែងការណ៍ដោយត្រង់ៗបង្ហាញពីការខកចិត្តរបស់ទីក្រុងប៉េកាំងចំពោះសង្គ្រាមនៅអ៊ីរ៉ង់ក៏ដោយ។ ក្រសួងបាននិយាយថា «ជម្លោះនេះ មិនគួរកើតឡើងឡើយ គ្មានហេតុផលដើម្បីបន្តទៀតទេ»។