ភ្នំពេញ៖ គិតត្រឹមថ្ងៃទី១៦ ខែមេសានេះ ត្រូវនឹងថ្ងៃទី៣ នៃពិធីបុណ្យចូលឆ្នាំប្រពៃណីជាតិខ្មែរ បានកត់សម្គាល់ឃើញថា នៅតាមបណ្តាហាង និងផ្សារនានាក្នុងរាជធានីភ្នំពេញ ដូចជាផ្សារធំថ្មី ផ្សារអូរឬស្សី និងផ្សារកណ្តាលជាដើម ឃើញមានអាជីវករមួយចំនួនតូចនៅតែបន្តបើកលក់ជាធម្មតា ខណៈមួយចំនួនធំផ្សេងទៀតឈប់សម្រាកក្នុងពិធីបុណ្យចូលឆ្នាំនេះ។

ជួបសម្ភាសន៍រវាងទូរទស្សន៍ព័ត៌មាន ប៊ីធីវី និងក្រុមអាជីវករផ្សារធំថ្មី ក្នុងខណ្ឌដូនពេញ ពួកគាត់បានលើកឡើងស្រដៀងគ្នាថា រាល់ពិធីបុណ្យជាតិ បុណ្យទាននានា និងទោះបីជាបុណ្យចូលឆ្នាំខ្មែរ ខកខានរៀបចំពិធីរយៈពេល ២ឆ្នាំយ៉ាងណាក៏ដោយ ក៏កម្រ​នឹង​បិទតូប​ណាស់ ​ដោយសារថ្ងៃទាំងនោះ​ អាចរកប្រាក់ចំណូលបានច្រើនជាងថ្ងៃធម្មតា។

លោក យស សុក្រា ​ពលរដ្ឋរស់នៅតំបន់ទឹកថ្លា​ ខណ្ឌសែនសុខ បានឲ្យប៊ីធីវី ដឹងថា ទោះបីជាបុណ្យចូលឆ្នាំខ្មែរឆ្នាំនេះ​ មានការរៀបចំពិធី​សង្រ្កាន្ដ​នៅតាមបណ្តាខេត្ត និង​បើកទេសចរណ៍ទូលាយឡើងវិញក៏ដោយ ក៏រូបលោកមិនគម្រោងចង់ទៅទីណាទេ ដោយសារចង់ឈប់សម្រាកក្រោយនឿយហត់ពីការងារ និងជួបជុំគ្រួសារនៅផ្ទះ។

សូមបញ្ជាក់ថា ពិធីបុណ្យចូលឆ្នាំប្រពៃណីជាតិខ្មែរ ​ខកខានឲ្យមានរៀបចំពិធីរយៈពេល ២ឆ្នាំហើយ (២០២០និង២០២១) ដោយសារវិបត្តិសលកកូវីដ១៩។ បន្ទាប់នៅឆ្នាំ២០២២នេះ រាជរដ្ឋាភិបាល​កម្ពុជា ​បានសម្រេចបើកឲ្យរៀបចំពិធីនានាឡើងវិញ​នៅទូទាំងប្រទេស ខណៈការឆ្លងរាលដាល​ជំងឺកូវីដ១៩ ​បានថមថយ ​និងខណៈប្រជាពលរដ្ឋទទួលបានវ៉ាក់សាំងបង្ការកូវីដគ្រប់ៗគ្នា រហូត​ដល់ដូសទី៣ ឬដូសជំរុញ៕ អត្ថបទ៖ ឈិត បូរ៉ាវី