ការិយាល័យបេសកជនពិសេសរបស់អង្គការសហប្រជាជាតិប្រចាំប្រទេសយេម៉ែន បាននិយាយថា រដ្ឋាភិបាលយេម៉ែនដែលត្រូវបានទទួលស្គាល់ជាអន្តរជាតិ និងក្រុមហ៊ូទី ដែលមានសម្ព័ន្ធភាពជាមួយអ៊ីរ៉ង់ នឹងដោះដូរឈ្លើយសឹកជាង១.៦០០នាក់ ជាការដោះលែងអ្នកជាប់ឃុំច្រើនបំផុត ចាប់តាំងពីការផ្ទុះឡើងសង្គ្រាមនៅយេម៉ែន។

ជម្លោះ បានផ្ទុះឡើងបន្ទាប់ពីក្រុមហ៊ូទីបានដណ្តើមយករដ្ឋធានីសាណាក្នុងឆ្នាំ២០១៤ ជំរុញឱ្យមានអន្តរាគមន៍យោធាដឹកនាំដោយប្រទេសអារ៉ាប៊ីសាអ៊ូឌីត ដើម្បីគាំទ្ររដ្ឋាភិបាល នៅឆ្នាំបន្ទាប់។ មន្ត្រីក្រុមហ៊ូទី និយាយថា ក្រោមកិច្ចព្រមព្រៀងនេះ ក្រុមហ៊ូទី នឹងដោះលែងឈ្លើយសឹកចំនួន ៥៨០នាក់ រួមទាំងពលរដ្ឋអារ៉ាប៊ីសាអ៊ូឌីតចំនួន ៧នាក់ និងជនជាតិស៊ូដង់២០នាក់ ខណៈរដ្ឋាភិបាលនឹងដោះលែងឈ្លើយសឹកក្រុមហ៊ូទីចំនួន ១.១០០នាក់។

ភាគីទាំងពីរ បានព្រមព្រៀងគ្នាបើកកិច្ចពិភាក្សាបន្ថែមទៀតលើការដោះលែងបន្ថែម និងអនុញ្ញាតឱ្យមានដំណើរទស្សនកិច្ចទៅវិញទៅមកទៅកាន់មណ្ឌលឃុំឃាំង។ ពួកគេ ក៏បានព្រមព្រៀងគ្នាលើផែនការអនុវត្តជាមួយគណៈកម្មាធិការកាកបាទក្រហមអន្តរជាតិ ដើម្បីបន្តប្រតិបត្តិការដោះលែង។ លោក Farhan Haq អ្នកនាំពាក្យរងអង្គការសហប្រជាជាតិ បាននិយាយកាលពីថ្ងៃសុក្រ ទី១៥ ខែឧសភា ថា កិច្ចព្រមព្រៀងនេះគឺជា «លទ្ធផលនៃការចរចាដោយផ្ទាល់រយៈពេលជាច្រើនសប្តាហ៍មកហើយនៅទីក្រុង Amman ប្រទេសហ្ស៊កដានី ក្រោមការគាំទ្ររបស់អង្គការសហប្រជាជាតិ» ហើយ លោកអគ្គលេខាធិការបានជំរុញឱ្យភាគីនានា «មានចំណាត់ការយ៉ាងឆាប់រហ័សឈានទៅរកការអនុវត្តកិច្ចព្រមព្រៀងនេះ ដោយសហការជាមួយគណៈកម្មាធិការកាកបាទក្រហមអន្តរជាតិ ដើម្បីឱ្យក្រុមគ្រួសារអាចជួបជុំគ្នាវិញបានឆាប់តាមដែលអាចធ្វើទៅបាន»។