ភ្នំពេញ៖ ស្ទើរគ្រប់ភូមិទំាងអស់នៅក្នុងខេត្តកណ្តាល គេសង្កេតឃើញថា បណ្តាប្រជាពលរដ្ឋ ពិសេសក្រុមយុវជនវ័យក្មេង បានបន្តលេងល្បែងកម្សាន្តលក្ខណៈគ្រួសារនៅតាមគេហដ្ឋាន និងដងផ្លូវសាធារណៈមួយចំនួន លេងបាចទឹក ប៉ាតម្ស៉ៅ និងការចាក់ធុងបាស់រាំលេងសប្បាយអើងកងផងដែរ។

អំឡុងពេលនៃការលេងកម្សាន្តនោះ បណ្តាប្រជាពលរដ្ឋ ពិសេសក្រុមយុវជនវ័យក្មេង ក៏បានថ្លែង​អំណរ​អរគុណជូនចំពោះសម្តេចតេជោ ហ៊ុន សែន នាយករដ្ឋមន្ត្រី ដែលបានខិតខំស្វែងរកវ៉ាក់សំាង​កូវីដ១៩​ចាក់ជូនប្រជាពលរដ្ឋ ​និងបានបើកការរៀបចំកម្មវិធីបុណ្យចូលឆ្នាំថ្មី ឆ្នាំខាលឡើងវិញ ដែលធ្វើ​អោយ​គេមានការសប្បាយរីករាយជាខ្លាំងឡើងវិញ ​ខណៈការកម្សាន្តសប្បាយបែបនេះ គឺបានអាក់ខាន​អស់រយៈពេល២ឆ្នាំកន្លងមកហើយ។

ពលរដ្ឋ ថ្លែងថា ជារួមកម្មវិធីបុណ្យចូលឆ្នាំថ្មី ឆ្នាំខាល ឆ្នាំ២០២២ នៅថ្ងៃទី២ គឺរដ្ឋបាលខេត្តកណ្តាល​បានបង្កើតកម្មវិធីបង្កលក្ខណៈអោយ​បណ្តា​ពលរដ្ឋសប្បាយ​រីករាយ​ជា​ខ្លាំង​ជាមួយនឹង​ការដើរមើល​ទេសភាពការ​តុបតែង​សំអាតក្រុង ​ការរាំកម្សាន្ត​ ការលេងល្បែង​ប្រជាប្រិយ​មាន​លេង​ចោលឈូង លោត បាវ ទាញព្រ័ត្រ ​ប្រកួតកីឡា មើលការសំដែងសិល្បៈ ​ដើរមើលតង់តាំង​ពិព័រណ៍​ទំនិញ និង​ហូបអាហារប្រពៃណីខ្មែរជាដើម៕ អត្ថបទ ស៊ុម សុខជា