សហគមន៍អេកូទេសចរណ៍កោះផ្តៅ គឺជាតំបន់ទេសចរណ៍ធម្មជាតិ និងវប្បធម៌ដ៏មានសក្ដានុពលមួយ ស្ថិតនៅលើកោះរងាវ ដែរជាកោះវែងជាងគេក្នុងទន្លេមេគង្គ​សហគមន៍នេះ មានទីតាំងស្ថិតនៅភូមិសំភិន ឃុំកំពង់ចាម ស្រុកសំបូរ ខេត្តក្រចេះ មានចំងាយប្រមាណជា ៤៥គីឡូម៉ែត្រពីទីរួមខេត្តក្រចេះ។

ដើម្បីទៅដល់សហគមន៍ ភ្ញៀវទេសចរណ៍ ត្រូវធ្វើដំណើរតាមផ្លូវគោកប្រវែងប្រមាណ​ ៣៨គីឡូម៉ែត្រ ពីទីរួមខេត្តក្រចេះ ទៅកាន់ស្រុកសំបូរ និងបន្តដំណើរតាមទូកពីស្រុកសំបូរទៅ​កាន់​កោះរងាវ រួចបន្ត​ដំណើរប្រមាណជា ៦ គីឡូម៉ែត បន្តទៀត ទើបទៅដល់គោលដៅ ទេសចរសហគមន៍។

នៅក្នុងតំបន់នេះ សម្បូរទៅដោយធនធានធម្មជាតិយ៉ាងសំបូរបែប និងជាតំបន់ដ៏មាន សក្តានុពលដល់វិស័យអេកូទេសចរណ៍​បែបធម្មជាតិ និងវប្បធម៌ដ៏ស្រស់ត្រកាល ដូចជា ឆ្នេរខ្សាច់ដ៏ស្រស់ស្អាត សត្វផ្សោតទន្លេមេគង្គ សម្រស់ដើមឈើព្រៃលិចទឹក ទឹកទន្លេដ៏សែន ត្រជាក់ សត្វស្លាបដ៏កម្រ សត្វត្រីជាច្រើនប្រភេទ និងការរស់នៅតាមបែប ទំនៀមទម្លាប់ បុរាណរបស់ប្រជាជននៅទីនោះដែលមានដើមកំណើតជាខ្មែរ។តាមការឲ្យដឹងពីមន្ត្រីនៃមន្ទីរទេសចរខេត្តក្រចេះ បានឲ្យដឹងថា សហគមន៍ អេកូទេសចរណ៍ កោះផ្តៅ មានផ្ដល់សេវាកម្ម និងការកម្សាន្តក្នុងសហគមន៍​ ដូចជា ផ្ទះឈើបែបខ្មែរបុរាណ សម្រាប់ស្នាក់នៅជាមួយប្រជាជនក្នុងតម្លៃសមរម្យ,​ មានម្ហូបអាហារ តាមទម្លាប់អ្នកភូមិ​ ស្រុកស្រែដែលចម្អិនដោយស្នាដៃអ្នកភូមិផ្ទាល់​ ហើយអ្នកទេសចរណ៍ អាចជិះទូកទស្សនា សត្វផ្សោត បោះតង់ និងការទស្សនាសត្វស្លាប គយគន់ទេសភាពថ្ងៃលិច តាមមាត់ទន្លេ អាចជិះម៉ូតូឌុបទស្សនាការជីវិតនិងរស់នៅក្នុងសហគមន៍ ក៏ដូចជា ជួលកង់ជិះទស្សនាជុំវិញកោះជាដើម។

ក្រៅពីនោះ ភ្ញៀវទេសចរណ៍ នៅអាចចូលរួមសកម្មភាពធ្វើកសិកម្ម ​ និងកសិឧកម្ម ជាមួយប្រជាពលរដ្ឋក្នុងសហគមន៍ ដូចជា ព្យូស្រែ​ ស្ទួងស្រូវ ច្រូតស្រូវ ជីកស្រះចិញ្ចឹមត្រី ចិញ្ចឹមកង្កែប ធ្វើទ្រុងមាន់ ទា និងសកម្មភាពដាំដុះបន្លែផ្លែឈើហូបផ្លែផ្សេងៗ ដ៏សំបូរបែប ផងដែរ៕