ប្រធានាធិបតីអ៊ុយក្រែនលោក Volodymyr Zelenskiy និយាយថា រុស្ស៊ីកំពុងព្យាយាមអូសទាញបេឡារុសឲ្យធ្លាក់កាន់តែជ្រៅទៅក្នុងសង្រ្គាមរបស់ខ្លួននៅអ៊ុយក្រែន ហើយនិងពិចារណាផែនការវាយប្រហារភាគខាងជើងអ៊ុយក្រែន ឬប្រទេសសមាជិកអង្គការណាតូ ចេញពីទឹកដីបេឡារុស ។

លោកថា អ៊ុយក្រែនបានដឹងពីទំនាក់ទំនងបន្ថែមទៀតរវាងរុស្ស៊ី និងប្រធានាធិបតីបេឡារុសលោក Lukashenko ដើម្បីបញ្ចុះបញ្ចូលលោកឲ្យចូលរួមប្រតិបត្តិការឈ្លានរបស់ពួកគេ ។

បេឡារុសមានព្រំដែនជាប់ជាមួយប្រទេសប៉ូឡូញ លីទុយអានី និងឡាតវី ដែលជាសមាជិកអង្គការណាតូ នៅភាគខាងជើង និងភាគខាងលិច ហើយអ៊ុយក្រែននៅភាគខាងត្បូង ។

នៅមិនទាន់មានការឆ្លើយតបភ្លាមៗនោះទេពីរុស្ស៊ីចំពោះសេចក្តីអត្ថាធិប្បាយរបស់លោក Zelenskiy ។ ទីក្រុងមូស្គូ ពុំបានបញ្ចេញផែនការយោធារបស់ខ្លួននោះទេនៅអ៊ុយក្រែន ដែលត្រូវបានគេចាត់ទុកថាជា ការសម្ងាត់រដ្ឋ ។

លោក Lukashenko ដែលស្ថិតក្នុងចំណោមសម្ព័ន្ធមិត្តជិតស្និទ្ធបំផុតរបស់ប្រធានាធិបតីរុស្ស៊ីលោក Vladimir Putin អនុញ្ញាតឲ្យទឹកដីប្រទេសរបស់លោកប្រើប្រាស់ជាផ្នែកមួយនៃកាវាយលុកពេញបន្ទុកកាលពីឆ្នាំ ២០២២របស់រុស្ស៊ី លើប្រទេសជិតខាងតូចតាចជាងខ្លួន បើទោះបីជារូបលោកមិនបានបញ្ជូនទាហានបេឡារុសឲ្យចូលរួមប្រយុទ្ធនៅទីនោះក៏ដោយ ។

ចាប់តាំងពីពេលនោះមក ទីក្រុង Minsk បានយល់ព្រមឲ្យដាក់ពង្រាយអាវុធនុយក្លេអ៊ែរតាក់ទិករុស្ស៊ី និងមីស៊ីលល្បឿនលឿនជាងសំឡេង Oreshnik របស់រុស្ស៊ីលើទឹកដីរបស់ខ្លួន ៕