យោងតាមការចេញផ្សាយរបស់សារព័ត៌មាន Al Jazeera ដែលរាយការណ៍ពីទីក្រុងហ្កាហ្សាបានឲ្យដឹងថា ការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សា បានសម្លាប់ពលរដ្ឋប៉ាឡេស្ទីនយ៉ាងហោចណាស់៨នាក់ រួមទាំងបីនាក់នៅក្រុង Deir el-Balah និងអ្នកផ្សេងទៀតនៅក្រុង Khan Younis និង Beit Lahiya។ ការវាយប្រហារកាលពីថ្ងៃអាទិត្យលើទីក្រុង Deir el-Balah ភាគកណ្តាល បានដាក់គោលដៅលើផ្ទះបាយសហគមន៍មួយកន្លែង ហើយជនរងគ្រោះបីនាក់គឺជាបុគ្គលិកផ្ទះបាយសហគមន៍។

សារព័ត៌មាននិយាយថា «នេះបង្ហាញថា អ៊ីស្រាអែលមិនត្រឹមតែកំណត់គោលដៅលើប្រជាជនប៉ុណ្ណោះទេ ប៉ុន្តែថែមទាំងអង្គការនានាដែលបម្រើសហគមន៍នៅទូទាំងតំបន់ហ្កាហ្សាផងដែរ»។ ដោយឆ្លើយតបទៅនឹងការវាយប្រហារ ក្រុមហាម៉ាសបាននិយាយថា វាគឺជា «ឧក្រិដ្ឋកម្មសង្គ្រាមដោយចេតនា និងជាហេតុការណ៍ថ្មីនៃអំពើប្រល័យពូជសាសន៍ដែលនៅបន្តប្រឆាំងប្រជាជនរបស់យើងនៅក្នុងតំបន់ហ្កាហ្សា»។

សេចក្តីថ្លែងការណ៍របស់ក្រុមប្រដាប់អាវុធបាននិយាយថា «រឿងនេះ កើតឡើងក្នុងពេលមានភាពស្ងៀមស្ងាត់ និងភាពអសកម្មរបស់អន្តរជាតិដែលជំរុញឱ្យការចូលកាន់កាប់នេះ បន្តការសម្លាប់រង្គាល ដោយមិនអើពើទៅនឹងតម្លៃ បទដ្ឋាន និងច្បាប់អន្តរជាតិអ្វីទាំងអស់»។

យោងតាមស្ថិតិរបស់អាជ្ញាធរសុខាភិបាលតំបន់ហ្កាហ្សាដែលបានចេញផ្សាយកាលពីថ្ងៃអាទិត្យ បានឲ្យដឹងថា សង្គ្រាមប្រល័យពូជសាសន៍របស់អ៊ីស្រាអែល នៅតំបន់ហ្កាហ្សា បានសម្លាប់ពលរដ្ឋប៉ាឡេស្ទីនយ៉ាងហោចណាស់ ៧២.៧៦០នាក់ ចាប់តាំងពីថ្ងៃទី ៧ ខែតុលា ឆ្នាំ ២០២៣ រួមទាំងយ៉ាងហោចណាស់ ៨៧១ នាក់ចាប់តាំងពីអ្វីដែលគេហៅថា បទឈប់បាញ់ដែលបានចាប់ផ្តើមកាលពីខែតុលា ឆ្នាំមុន។