មេដឹកនាំកោះតៃវ៉ាន់ លោក ឡៃ ឆឹងតឺ(Lai Ching-te) បានស្នើសុំឱ្យមានការបន្តលក់អាវុធរបស់សហរដ្ឋអាមេរិក។ ការស្នើសុំនេះ ធ្វើឡើងបន្ទាប់ពីការថ្លែងលើកឡើងរបស់ប្រធានាធិបតីសហរដ្ឋអាមេរិក លោក Donald Trump ថាទីក្រុងវ៉ាស៊ីនតោន អាចប្រើប្រាស់ឥទ្ធិពលលើពួកគេ ជា «គន្លឹះនៃការចរចាដ៏ល្អ» ក្នុងការដោះស្រាយជាមួយទីក្រុងប៉េកាំង។

លោក Lai បានថ្លែងដូច្នេះ នៅក្នុងការបង្ហោះនៅលើបណ្តាញផ្សព្វផ្សាយសង្គមកាលពីថ្ងៃអាទិត្យថា ប្រទេសចិន បានបង្កើនសម្ពាធយោធារបស់ខ្លួននៅជិតកោះតៃវ៉ាន់។ លោកបានដាក់ ប្រទេសចិនថាជាមូលហេតុចម្បងនៃអស្ថិរភាពក្នុងតំបន់ និងការផ្លាស់ប្តូរស្ថានភាពបច្ចុប្បន្ន។ លោក Lai បានបញ្ជាក់ថា កោះតៃវ៉ាន់ ព្យាយាមការពារស្ថានភាពបច្ចុប្បន្ន និងបញ្ហាដែលគេហៅថា «ឯករាជ្យភាពកោះតៃវ៉ាន់» ដែលពុំមាន។

លោកបាននិយាយថា ការលក់អាវុធរបស់សហរដ្ឋអាមេរិកទៅឱ្យកោះតៃវ៉ាន់ និងកិច្ចសហប្រតិបត្តិការសន្តិសុខរវាងភាគីទាំងពីរគឺជាធាតុផ្សំសំខាន់ៗក្នុងការការពារសន្តិភាព និងស្ថិរភាពក្នុងតំបន់។

លោក Trump បានធ្វើការអត្ថាធិប្បាយអំពី «គន្លឹះនៃការចរចា» នៅក្នុងបទសម្ភាសន៍របស់ប្រព័ន្ធផ្សព្វផ្សាយ Fox News បន្ទាប់ពីលោកបានបញ្ចប់ដំណើរទស្សនកិច្ចទៅកាន់ប្រទេសចិន ជាទីដែលលោកបានជួបជាមួយប្រធានាធិបតីចិន លោក Xi Jinping នៅទីក្រុងប៉េកាំង ក្នុងអំឡុងពេលដំណើរទស្សនកិច្ចនោះ។ ទាក់ទងនឹងកោះតៃវ៉ាន់ លោក Trump បាននិយាយនៅក្នុងបទសម្ភាសន៍ថា «តៃវ៉ាន់ មានអ្នកនៅទីនោះដែលបច្ចុប្បន្នចង់បានឯករាជ្យ» ហើយ «ពួកគេគិតថា មានសហរដ្ឋអាមេរិកនៅពីក្រោយខ្នង» ដោយលោកបាននិយាយបន្ថែមថា «ខ្ញុំចង់ឃើញ វាស្ថិតនៅក្នុងស្ថានភាពបច្ចុប្បន្ន»។