រដ្ឋាភិបាលនៅក្នុងរដ្ឋ Puebla របស់ប្រទេសម៉ិកស៊ិក បានបញ្ជាក់ពីអ្នកស្លាប់មានចំនួន១០នាក់ ក្នុងការបាញ់ប្រហារនៅពេលព្រឹកព្រលឹមក្នុងទីក្រុង Tehuitzingo។ កាលពីថ្ងៃអាទិត្យ រដ្ឋាភិបាលរដ្ឋ បានកំណត់អត្តសញ្ញាណជនរងគ្រោះថាមានបុរស៦នាក់ ស្ត្រី៣នាក់ និងអនីតិជនម្នាក់។

មន្ត្រីរដ្ឋាភិបាលនិយាយថា ជនរងគ្រោះត្រូវបានវាយប្រហារដោយជនប្រដាប់អាវុធនៅក្នុងលំនៅឋានមួយកន្លែង។ នៅពុំទាន់មានការចាប់ខ្លួនណាមួយត្រូវបានប្រកាសនៅឡើយ ហើយហេតុផលសម្រាប់ការវាយប្រហារនៅតែមិនទាន់ច្បាស់។ ដោយឡែក ការិយាល័យរដ្ឋអាជ្ញា បានប្រកាសថាខ្លួនបានបើកការស៊ើបអង្កេតលើការបាញ់ប្រហារនេះ ដែលបានកើតឡើងខណៈប្រទេសម៉ិកស៊ិក កំពុងត្រៀមរៀបចំសហការធ្វើជាម្ចាស់ផ្ទះ FIFA World Cup ដែលមានពេលនៅមិនដល់មួយខែទៀតនោះទេ។

សេចក្តីថ្លែងការណ៍និយាយថា យោងតាមរបាយការណ៍បឋម មន្ត្រីនគរបាលក្រុង បានទៅដល់កន្លែងកើតហេតុ បន្ទាប់ពីទទួលបានសំណើសុំជំនួយពីពលរដ្ឋ។ ពេលទៅដល់លំនៅឋាន អាជ្ញាធរបានឃើញមនុស្សជាច្រើននាក់រងរបួសដោយគ្រាប់កាំភ្លើង។

ទីក្រុង Tehuitzingo មានប្រជាជនប្រមាណ ១១.៣០០នាក់ ស្ថិតនៅចម្ងាយប្រហែល ២០៨គីឡូម៉ែត្រ ភាគខាងត្បូងរដ្ឋធានី Mexico City របស់ប្រទេស។

មន្ត្រីបានប្តេជ្ញាថានឹងឆ្លើយតបចំពោះការវាយប្រហារនេះ ដោយមានការចូលរួមពីឆ្មាំជាតិ ការិយាល័យរដ្ឋអាជ្ញា នគរបាលរដ្ឋនិងមូលដ្ឋាន ព្រមទាំងការស៊ើបការណ៍សម្ងាត់ ការវិភាគ និងកិច្ចខិតខំប្រឹងប្រែងសម្របសម្រួលអន្តរស្ថាប័ន។