លោក Xi Jinping ​ និង​​លោក​ Vladimir Putin បានផ្លាស់ប្តូរ «លិខិតអបអរសាទរ» កាលពី​​​ថ្ងៃអាទិត្យ មុនដំណើរទស្សនកិច្ចរបស់ប្រធានាធិបតីរុស្ស៊ី ទៅ​កាន់ទីក្រុងប៉េកាំង ក្នុងសប្តាហ៍នេះ បួនថ្ងៃចាប់តាំងពីលោក Donald Trump បានចាកចេញពីប្រទេសចិន បន្ទាប់ពីកិច្ចប្រជុំកំពូលដ៏សំខាន់មួយ។វិមានក្រឹមឡាំង​​​​បាននិយាយថា​​លោក​ Putin ​នឹង​​បំពេញ​ទស្សនកិច្ច​​ផ្លូវ​រដ្ឋ​​​​​​ទៅកាន់​​ប្រទេស​ចិន​​​នៅថ្ងៃ​១៩ ​និង​​​២០​​​ ​ឧសភា ​​​សប្ដាហ៍នេះ​។

យោងតាមប្រព័ន្ធផ្សព្វផ្សាយរដ្ឋចិន ​លោកប្រធានាធិបតី​ Xi​ បានថ្លែង​​​ថា កិច្ចសហប្រតិបត្តិការទ្វេភាគីរវាងរុស្ស៊ី និងចិន «កាន់តែស៊ីជម្រៅ និងរឹងមាំជាបន្តបន្ទាប់» ដោយឆ្នាំនេះ គឺជាខួបលើកទី៣០​ នៃភាពជាដៃគូយុទ្ធសាស្ត្ររបស់ប្រទេសទាំងពីរ ។

អត្ថបទមួយដែលបានចុះផ្សាយនៅក្នុងកាសែតប្រព័ន្ធផ្សព្វផ្សាយរដ្ឋ Global Timesនៅ​ថ្ងៃចន្ទនេះ​ បាននិយាយថា ដំណើរទស្សនកិច្ចរបស់ប្រធានាធិបតីអាមេរិក និងរុស្ស៊ី បានបង្ហាញថា ទីក្រុងប៉េកាំង «កំពុងលេចចេញយ៉ាងឆាប់រហ័ស ជាចំណុចកណ្តាលនៃការទូតសកល»។

កាសែត Global Times ដដែល​​បាននិយាយថា ដំណើរទស្សនកិច្ចដែលមានលំដាប់លំដោយយ៉ាងតឹងរ៉ឹងបានបង្កឱ្យមានការចាប់អារម្មណ៍យ៉ាងទូលំទូលាយ ដោយក្រុម​​អ្នកវិភាគបានកត់សម្គាល់ថា វាកម្រមានណាស់នៅក្នុងសម័យក្រោយសង្គ្រាមត្រជាក់សម្រាប់ប្រទេសមួយក្នុងការធ្វើជាម្ចាស់ផ្ទះសម្រាប់មេដឹកនាំសហរដ្ឋអាមេរិក និងរុស្ស៊ីជាប់ៗគ្នាក្នុងរយៈពេលមួយសប្តាហ៍។     

យោងតាមក្រុម​អ្នកការទូត និងអ្នកវិភាគលោកខាងលិច ​បាន​ឲ្យដឹងថា​ ទំនាក់ទំនងកាន់តែស៊ីជម្រៅរបស់ប្រទេសចិនជាមួយរុស្ស៊ី គឺជាមូលហេតុនៃការព្រួយបារម្ភនៅបស្ចិមលោក ជាពិសេសចាប់តាំងពីទីក្រុងមូស្គូបានចាប់ផ្តើមវាយលុក​​អ៊ុយក្រែនទ្រង់ទ្រាយធំនៅឆ្នាំ២០២២។ មេដឹកនាំ​ទាំងពីរបានជួបគ្នាជាង​​​៤០​ លើក ដែលលើសពីការជួបរបស់លោក Xi ជាមួយបណ្ដា​​មេដឹកនាំលោកខាងលិច​ទៅលិច​៕