រញ្ជួយដីកម្រិត ៥,២ រ៉ិចទ័រនៅតំបន់ Guangxi ភាគនិរតីប្រទេសចិននៅព្រឹកថ្ងៃចន្ទ ១៨ ឧសភា​នេះ​​ បានសម្លាប់មនុស្សពីរនាក់ និងបង្ខំឱ្យមនុស្សជាង ៧.០០០ នាក់នៅក្នុងទីក្រុង Liuzhou ជម្លៀសចេញពីលំនៅឋាន​​ ខណៈ​ប្រតិបត្តិការស្វែងរក និងជួយសង្គ្រោះនៅតែបន្ត ហើយក្រុម​​​អាជ្ញាធរព្រមានអំពីការរំខានដល់ការដឹកជញ្ជូន។​

យោងតាមការចុះផ្សាយរបស់ទូរទស្សន៍​ CCTV និងទីភ្នាក់ងារសារព័ត៌មានរដ្ឋ Xinhua ​​​មានអ្នកស្លាប់ពីរនាក់ដែលបានបញ្ជាក់ និងម្នាក់នៅតែបាត់ខ្លួន ហើយមនុស្សបួននាក់ត្រូវបានបញ្ជូនទៅមន្ទីរពេទ្យ ទោះបីជាគ្មាននរណាម្នាក់ក្នុងចំណោមពួកគេមានរបួសគំរាមកំហែងដល់អាយុជីវិតក៏ដោយ ។​

យោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋ CCTV ដដែល ​​បានឲ្យដឹងថា​ ​អគារចំនួន ១៣កន្លែង​​​ បានដួលរលំនៅព្រឹកព្រលឹមថ្ងៃចន្ទ​នេះ ។​

ក្រុម​​​អាជ្ញាធរផ្លូវដែកក៏បានព្រមានពីការរំខានដល់ការដឹកជញ្ជូនផងដែរ ខណៈ​ពួកគេបានត្រួតពិនិត្យ​ហេដ្ឋារចនាសម្ព័ន្ធផ្លូវដែក។

ប្រព័ន្ធផ្សព្វផ្សាយរដ្ឋខាងលើ​​​បានរាយការណ៍ថា ប្រព័ន្ធ​ទូរគមនាគមន៍​ និងបណ្ដាញ​អគ្គិសនី​ ការផ្គត់ផ្គង់ទឹក និងឧស្ម័ន និងចរាចរណ៍នៅក្នុងតំបន់ដែលរងផលប៉ះពាល់ កំពុងដំណើរការធម្មតា៕