ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទ​​​​១៨​​ ឧសភា​​​នេះ​ ​ថា​ មេដឹកនាំកូរ៉េខាងជើង លោក Kim Jong Un បាននិយាយថា ផែនការពង្រឹងអង្គភាពជួរមុខនៅតាមព្រំដែនជាមួយកូរ៉េខាងត្បូង ក៏ដូចជាអង្គភាពសំខាន់ៗផ្សេងទៀត គឺជាគន្លឹះក្នុងការទប់ស្កាត់សង្គ្រាមឲ្យបានហ្មត់ចត់។​ 

​​KCNA ​​​និយាយថា​ ​​ការអត្ថាធិប្បាយរបស់លោក Kim ​ ស្តីពីការពង្រឹងកម្លាំងយោធានៅតាមព្រំដែន ដើម្បីធ្វើឱ្យក្លាយជា «បន្ទាយដ៏រឹងមាំ» បានកើតមាន​​ឡើងនៅក្នុងកិច្ចប្រជុំមួយកាលពីថ្ងៃអាទិត្យ របស់មេបញ្ជាការកងពល និងកងពលតូចទូទាំង​ប្រទេស​។​ ​

យោងតាម ​​KCNA ដដែល ​​​លោកបានអំពាវនាវឱ្យកែសម្រួល «ប្រព័ន្ធបណ្តុះបណ្តាល និងពង្រីកសមត្ថភាព​​យុទ្ធជាក់ស្តែង ដើម្បីឆ្លុះបញ្ចាំងពីការផ្លាស់ប្តូរនៅក្នុងសង្គ្រាមសម័យទំនើប និងកំណត់ឡើងវិញនូវគោលគំនិតប្រតិបត្តិការនៅក្នុងយោធាកូរ៉េខាងជើង។​​

មេដឹកនាំ​កំពូល​កូរ៉េខាងជើង​រូបនេះ​ បានសង្កត់ធ្ងន់លើភាពចាំបាច់​​​សម្រាប់ការប្រុងប្រយ័ត្នប្រឆាំងនឹង «សត្រូវដ៏សំខាន់»​​​ជាពាក្យដែលកូរ៉េខាងជើងបានប្រើសម្រាប់កូរ៉េខាងត្បូង។

កូរ៉េទាំងពីរនៅតែស្ថិតក្នុងសង្គ្រាមតាមភាសា​​​​បច្ចេកទេស បន្ទាប់ពីជម្លោះឆ្នាំ​​១៩៥០ ​​ដល់​១៩​៥៣​​ របស់ប្រទេស​បងប្អូន​កូរ៉េ​ទាំងពី​រ ដែល​​​បានបញ្ចប់ដោយបទឈប់បាញ់ជាជាងកិច្ចព្រមព្រៀងសន្តិភាព។

ក្រសួងបង្រួបបង្រួមកូរ៉េខាងត្បូង បាននិយាយនៅ​​ថ្ងៃចន្ទ​​​​នេះដែរ​​​ថា នេះ​​វាហាក់ដូចជាកិច្ចប្រជុំលើកដំបូងរបស់លោក Kim ជាមួយក្រុម​​​មេបញ្ជាការកងពល និង​កងពលតូច ចាប់តាំងពីលោកឡើងកាន់អំណាច ដោយបន្ថែមថា ទីក្រុងសេអ៊ូលនឹងបន្តគ្រប់គ្រងភាពតានតឹងផ្នែកយោធា និងស្វែងរកការកសាងទំនុកចិត្ត៕