ប្រធានាធិបតីអាមេរិក លោក Donald Trump បានចេញការព្រមានថ្មីមួយទៅកាន់អ៊ីរ៉ង់ កាល​ពី​ថ្ងៃអាទិត្យ (ទី១៧​ ខែឧសភា ឆ្នាំ២០២៦)​ ដោយនិយាយថា ប្រទេស​នេះ​ត្រូវតែចាត់វិធានការ​ឲ្យ​បានឆាប់រហ័សឆ្ពោះទៅរកកិច្ចព្រមព្រៀងសន្តិភាព ឬបើ​មិន​ដូច្នោះ​ទេ​ «ពួក​គេ​នឹងមិនមានអ្វីនៅសល់ឡើយ​»។

ទីក្រុងវ៉ាស៊ីនតោន ដែលជាប់នៅក្នុងជម្លោះជាមួយទីក្រុងតេអេរ៉ង់ ចាប់តាំងពីកងកម្លាំងអាមេរិក និងអ៊ីស្រាអែល បានបើកការវាយប្រហារដ៏​ធំ លើសាធារណរដ្ឋឥ​ស្លាម កាលពីថ្ងៃទី២៨​ ខែកុម្ភៈ បានជួបការលំបាក​ក្នុង​ការបំបែក​ភាពជាប់គាំង​ និងឈាន​ទៅរក​វឌ្ឍនភាពណាមួយឆ្ពោះទៅរកការបញ្ចប់សង្គ្រាមដែលបានធ្វើឲ្យ​តំបន់​មជ្ឈិមបូព៌ារង្គោះរង្គើ និងតម្លៃថាមពលហក់​ឡើង។

លោក Trump បានសរសេរនៅលើវេទិកាបណ្ដាញ​សង្គម​ Truth Social របស់លោក​ថា៖ «សម្រាប់អ៊ីរ៉ង់ ពេល​វេលា​កំពុង​អស់​ទៅ​ៗ​ហើយ​​ ហើយពួកគេគួរតែចាត់វិធានការឲ្យបាន​លឿន ឬបើ​មិន​ដូច្នេះ​ទេ ពួកគេ​នឹងមិនមានអ្វីនៅសល់ទៀត​ឡើយ​។ ពេលវេលាគឺជារឿងសំខាន់ណាស់​!»។

គួរបញ្ជាក់ថា សង្គ្រាមនេះបាននាំឲ្យ​មានការបិទច្រកសមុទ្រដ៏សំខាន់​ គឺ​ Hormuz ដែលប្រហែល ២០​ភាគរយនៃការនាំចេញប្រេងសកលឆ្លងកាត់ ក្នុងពេលមាន​សន្តិភាព ហើយបានទាញប្រទេសជិតខាង គឺអ៊ីស្រាអែល និងលីបង់ ចូលទៅក្នុងជម្លោះដ៏​អាក្រក់​មួយ។

ទីក្រុងវ៉ាស៊ីនតោន និងតេអេរ៉ង់បានយល់ព្រមឈាន​ដល់​បទឈប់បាញ់កាលពី​ថ្ងៃទី៨ ខែមេសា ប៉ុន្តែការចរចាសន្តិភាព បានជាប់គាំង ហើយការវាយប្រហារម្តងម្កាលនៅតែបន្តកើតមាន​​។ នៅ​ថ្ងៃទី១៧ ខែឧសភា ប្រព័ន្ធផ្សព្វផ្សាយអ៊ីរ៉ង់ បានរាយការណ៍​ថា សហរដ្ឋអាមេរិកបានបរាជ័យក្នុងការធ្វើសម្បទានជាក់ស្តែងណាមួយ នៅក្នុងការឆ្លើយតបចុងក្រោយរបស់ខ្លួន ចំពោះរបៀបវារៈដែលបានស្នើឡើងដោយ​អ៊ីរ៉ង់ សម្រាប់ការចរចា ដើម្បីបញ្ចប់សង្គ្រាម៕