ប្រមុខទីភ្នាក់ងារថាមពលអាតូមិកអន្តរជាតិ (IAEA) បានបង្ហាញការព្រួយបារម្ភយ៉ាងខ្លាំងចំពោះការវាយប្រហារដោយយានដ្រូនកាលពីថ្ងៃអាទិត្យ ដែលបណ្តាលឱ្យមានអគ្គិភ័យនៅជិតរោងចក្រថាមពលនុយក្លេអ៊ែរ Barakah នៅក្នុងប្រទេសអារ៉ាប់រួម (UAE) ដោយអំពាវនាវឱ្យមានភាពអត់ធ្មត់ខ្ពស់ខាងយោធា ដើម្បីបញ្ចៀសគ្រោះថ្នាក់នុយក្លេអ៊ែរ។

ទីភ្នាក់ងារ IAEA បាននិយាយនៅលើវេទិកាសង្គម X ដោយដកស្រង់ព័ត៌មានពីប្រទេសអារ៉ាប់រួមថា កម្រិតវិទ្យុសកម្មនៅរោងចក្រថាមពលនុយក្លេអ៊ែរ Barakah នៅតែធម្មតា ហើយពុំមានរបាយការណ៍អំពីអ្នករងរបួសនោះទេ។ យោងតាមទីភ្នាក់ងារIAEA ការវាយប្រហារដោយយានដ្រូនបានបង្កឱ្យមានអគ្គិភ័យនៅម៉ាស៊ីនភ្លើងក្នុងបរិវេណរោងចក្រ។

លោក Rafael Grossi អគ្គនាយក ទីភ្នាក់ងារ IAEA បាននិយាយថា សកម្មភាពយោធាដែលគំរាមកំហែងដល់សុវត្ថិភាពនុយក្លេអ៊ែរ គឺមិនអាចទទួលយកបានទេ។ លោក បានអំពាវនាវឱ្យមានភាពអត់ធ្មត់ខ្ពស់ខាងយោធានៅជិតរោងចក្រថាមពលនុយក្លេអ៊ែរណាមួយក៏ដោយ ដើម្បីបញ្ចៀសគ្រោះថ្នាក់នៃឧបទ្ទវហេតុនុយក្លេអ៊ែរ។