ក្រសួងសន្តិសុខសាធារណៈរបស់ប្រទេសចិន បាននិយាយកាលពីថ្ងៃអាទិត្យថា នគរបាលចិន សហរដ្ឋអាមេរិក និងអារ៉ាប់រួម បានធ្វើប្រតិបត្តិការអនុវត្តច្បាប់រួមគ្នាលើកដំបូងរបស់ខ្លួន ដោយបង្ក្រាបការក្លែងបន្លំតាមទូរគមនាគមន៍ និងតាមអ៊ីនធឺណិត នៅទីក្រុងឌូបៃ។ ក្រសួងបាននិយាយថា ប្រតិបត្តិការរបស់នគរបាលរួមគ្នា បានរុះរើទីតាំងក្លែងបន្លំចំនួន៩កន្លែង និងចាប់ខ្លួនជនសង្ស័យបាន ២៧៦ នាក់។

យោងតាមការស៊ើបអង្កេតដំបូង ក្រុមក្លែងបន្លំត្រូវបានចោទប្រកាន់ថាបានប្រើប្រាស់វេទិកាបណ្តាញផ្សព្វផ្សាយសង្គមដើម្បីទាក់ទងជនរងគ្រោះ និងបង្កើតទំនាក់ទំនងដោយការបញ្ចុះបញ្ចូលក្លែងបន្លំ។ បន្ទាប់ពីទទួលបានការជឿទុកចិត្តពីពួកគេ ជនសង្ស័យបានលួងលោមជនរងគ្រោះឱ្យវិនិយោគលើគម្រោងដែលគេហៅថារូបិយប័ណ្ណគ្រីបតូដែលមានផលចំណេញខ្ពស់ បណ្តាលឱ្យមានការខាតបង់ផ្នែកហិរញ្ញវត្ថុ។

ក្រសួងបាននិយាយថា ប្រតិបត្តិការរួមគ្នានេះ បង្ហាញពីសមិទ្ធផលដ៏សំខាន់មួយនៅក្នុងកិច្ចសហប្រតិបត្តិការអនុវត្តច្បាប់អន្តរជាតិដោយនគរបាលចិន ហើយនគរបាលចិននឹងពង្រឹងកិច្ចសហប្រតិបត្តិការជាក់ស្តែងជាមួយប្រទេសជាច្រើនទៀត អនុវត្តប្រតិបត្តិការរួមគ្នា រុះរើទីតាំងក្លែងបន្លំតាមទូរគមនាគមន៍ ខិតខំគ្រប់បែបយ៉ាងដើម្បីចាប់ខ្លួនជនសង្ស័យដែលពាក់ព័ន្ធទៅនឹងការក្លែងបន្លំទូរគមនាគមន៍ ការពារសិទ្ធិ និងផលប្រយោជន៍ស្របច្បាប់របស់ប្រជាជននៅគ្រប់ប្រទេសដោយប្រសិទ្ធភាព។