នៅក្នុងសេចក្តីថ្លែងការណ៍មួយ កាលពី​ថ្ងៃអាទិត្យ (ទី១៧ ខែឧសភា ឆ្នាំ២០២៦) ការិយាល័យ​ប្រធានាធិបតីកូរ៉េខាងត្បូង Blue House បានឲ្យ​ដឹងថា ប្រធានាធិបតីកូរ៉េខាងត្បូង លោក Lee Jae Myung និងប្រធានាធិបតីអាមេរិក លោក Donald Trump បានសន្ទនាតាមទូរស័ព្ទ នៅថ្ងៃទី១៧ ខែឧសភា ហើយបានពិភាក្សាអំពីលទ្ធផលនៃកិច្ចប្រជុំកំពូលអាមេរិក-ចិន។

ការិយាល័យប្រធានាធិបតីកូរ៉េខាងត្បូង Blue House បានបញ្ជាក់​ថា លោក Trump បានចែករំលែកជាមួយលោក Lee នូវលទ្ធផលនៃកិច្ចប្រជុំរបស់លោកជាមួយប្រធានាធិបតីចិន លោក Xi Jinping ដែល​រួម​មាន​ទំនាក់ទំនងអាមេរិក-ចិន កិច្ចព្រមព្រៀងលើបញ្ហាសេដ្ឋកិច្ច និងពាណិជ្ជកម្ម និងកិច្ចការកូរ៉េ ក៏ដូចជាស្ថានភាព នៅតំបន់​មជ្ឈិមបូព៌ា។

ការិយាល័យនេះបានឲ្យ​ដឹង​ទៀត​ថា ប្រធានាធិបតីកូរ៉េបានយល់​ឃើញថា លោក Trump និងលោក Xi មានការពិភាក្សាប្រកបដោយការ​ស្ថាបនា ជុំវិញ​កិច្ចការ នៅឧបទ្វីបកូរ៉េ។ ហើយ​យោងតាមការិយាល័យ Blue House បាន​បន្ថែម​ថា លោក Trump បានប្រាប់លោក Lee ថា ទំនាក់ទំនង រវាងសហរដ្ឋអាមេរិក និងចិន នឹងរួមចំណែកដល់សន្តិភាព និងស្ថិរភាព នៅឧបទ្វីបកូរ៉េ តាមរយៈកិច្ចសហប្រតិបត្តិការយ៉ាងជិតស្និទ្ធជាមួយកូរ៉េខាងត្បូង។

ចំណែក​លោក Lee បានប្រាប់លោក Trump ថា ការគ្រប់គ្រងប្រកបដោយស្ថិរភាពនៃទំនាក់ទំនងអាមេរិក-ចិន នឹងរួមចំណែកដល់សន្តិភាព និងវិបុលភាព នៅក្នុងតំបន់ និងពិភពលោក។ លោកក៏បានសម្តែងក្តីសង្ឃឹមរបស់លោកផង​ដែរ​ ចំពោះលោក Trump សម្រាប់ការស្តារសន្តិភាព និងស្ថិរភាពឡើងវិញភ្លាមៗ នៅតំបន់​មជ្ឈិមបូព៌ា។ សេចក្តីថ្លែងការណ៍​បាន​សង្កត់ធ្ងន់​ថា មេដឹកនាំ​ទាំង២ ​ក៏បាន​ពិភាក្សា​ផង​ដែរ អំពី​ការអនុវត្តដោយ​រលូននូវ​​​កិច្ចព្រមព្រៀង​ពាណិជ្ជកម្ម​ទ្វេភាគី​ដែល​បាន​ចុះហត្ថលេខា​ក្នុង​ឆ្នាំ២០២៥៕