បណ្ដាញ​ប្រព័ន្ធ​ផ្សព្វផ្សាយ ក្នុង​ស្រុក​ បាន​រាយការណ៍​ថា សៀវភៅសដែល​ចេញ​ដោយ​ក្រសួង​បង្រួប​បង្រួម​ នៅ​ថ្ងៃចន្ទ (ទី១៨ ខែឧសភា ឆ្នាំ២០២៦) នេះ បាន​បង្ហាញ​ថា រដ្ឋាភិបាលកូរ៉េខាងត្បូងក្រោមការដឹកនាំរបស់លោក​ប្រធានាធិបតី Lee Jae Myung បានប្តូរការផ្តោតអារម្មណ៍របស់ខ្លួនទៅជា «ការរួមរស់ដោយសន្តិភាព» ជាមួយកូរ៉េខាងជើង ជាជាង «សម្ពាធ និងការប្រឈមមុខដាក់គ្នា»។

ទីភ្នាក់ងារសារព័ត៌មាន Yonhap បាន​ឲ្យ​ដឹង​ថា សៀវ​ភៅ​ប្រចាំឆ្នាំនេះ ដែលមានសំ​ឡេង​ខុសគ្នាយ៉ាងច្បាស់ពីរដ្ឋាភិបាលមុន ឆ្លុះបញ្ចាំងពីការជំរុញរបស់រដ្ឋបាលលោក Lee ដែលបានចូលកាន់តំណែងក្នុងខែមិថុនា ឆ្នាំមុន ដើម្បីជួសជុលទំនាក់ទំនងអន្តរកូរ៉េដែលតានតឹង ដោយផ្អែកលើការកសាងទំនុកចិត្តគ្នាទៅវិញទៅមក​។

រដ្ឋាភិបាលអភិរក្សនិយមពី​មុនដែល​ដឹកនាំ​ដោយ​លោក​ប្រធានាធិបតី Yoon Suk Yeol បានស្វែងរកការនាំឲ្យ​មាន​ការផ្លាស់ប្តូរនៅក្នុងប្រទេសកូរ៉េខាងជើង តាម​រយៈការ​ដាក់​សម្ពាធ និងការលំហូរ​នៃព័ត៌មានខាងក្រៅយ៉ាង​ច្រើន​សន្ធឹកសន្ធាប់​។ ដោយលើកឡើងពីគោលការណ៍ណែនាំសំខាន់ៗចំនួន៣ សៀវ​ភៅ​នេះបានបញ្ជាក់​ថា ទីក្រុងសេអ៊ូលគោរពប្រព័ន្ធរបស់កូរ៉េខាងជើង មិនបន្តការបង្រួបបង្រួមដោយការទាញ​បញ្ចូល​​ និងមិនចូលរួមក្នុងសកម្មភាពអរិភាព​ឡើយ។

ឯកសារនេះក៏បានគូសបញ្ជាក់ពីផែនការ ដើម្បីធ្វើ​ឲ្យ​រស់ឡើងវិញនូវកិច្ចព្រមព្រៀងយោធាអន្តរកូរ៉េដែលត្រូវបានចុះហត្ថលេខាដោយអតីតប្រធានាធិបតី លោក​ Moon Jae-in និងមេដឹកនាំកូរ៉េខាងជើង លោក Kim Jong-un នៅថ្ងៃទី១៩ ខែកញ្ញា ឆ្នាំ២០១៨ និងបន្តកិច្ចព្រមព្រៀងទ្វេភាគី ដើម្បីបង្កើតមូលដ្ឋានគ្រឹះជាប្រព័ន្ធសម្រាប់ការរួមរស់ដោយសន្តិភាព៕