អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បាននិយាយនៅថ្ងៃចន្ទនេះថា អ៊ីរ៉ង់កំពុងផ្តោតលើការបញ្ចប់សង្គ្រាមនៅដំណាក់កាលនេះ ខណៈដែលខ្លួនបានឆ្លើយតបទៅនឹងសំណើថ្មីរបស់សហរដ្ឋអាមេរិកដែលមានគោលបំណងបញ្ចប់សង្គ្រាមនេះ ហើយការផ្លាស់ប្តូរកំពុងបន្តទោះបីជាមានរបាយការណ៍ប្រព័ន្ធផ្សព្វផ្សាយអ៊ីរ៉ង់ពិពណ៌នាអំពីការទាមទាររបស់ទីក្រុងវ៉ាស៊ីនតោនថា ហួសហេតុក៏ដោយ។

លោក Baqaei បាននិយាយក្នុងអំឡុងពេលសន្និសីទសារព័ត៌មានមួយថា៖«ដូចដែលយើងបានប្រកាសកាលពីថ្ងៃអាទិត្យរួចហើយ ក្តីបារម្ភរបស់យើង ត្រូវបានបង្ហាញដល់ភាគីអាមេរិក»។

លោកបាននិយាយថា ការផ្លាស់ប្តូរទស្សនៈគ្នា កំពុង«បន្តតាមរយៈអ្នកសម្របសម្រួលប៉ាគីស្ថាន» ដោយមិនផ្តល់ព័ត៌មានលម្អិត។

លោក Baqaei ក៏បាននិយាយផងដែរថា អ៊ីរ៉ង់កំពុងទាក់ទងជាបន្តបន្ទាប់ជាមួយអូម៉ង់ និងភាគីពាក់ព័ន្ធទាំងអស់ ដើម្បីពិភាក្សាអំពីយន្តការច្រកសមុទ្រហ័រមូស។

លោក Baqaei បានបញ្ជាក់ថា ក្រុមបច្ចេកទេសអ៊ីរ៉ង់ និងអូម៉ង់ បានជួបប្រជុំគ្នាកាលពីសប្តាហ៍មុននៅប្រទេសអូម៉ង់ ដើម្បីចរចាអំពីយន្តការសម្រាប់ការដឹកជញ្ជូនដោយសុវត្ថិភាពនៅក្នុងច្រកសមុទ្រហ័រមូស៕