ព្រឹទ្ធសភាហ្វីលីពីនត្រូវបានគ្រោងនឹងកោះប្រជុំនូវតុលាការចោទប្រកាន់ទម្លាក់តំណែង នៅថ្ងៃចន្ទ (ទី១៨ ខែឧសភា ឆ្នាំ២០២៦) នេះ ដែលអាចសម្រេចអនាគតរបស់អនុប្រធានាធិបតី លោកស្រី Sara Duterte ដោយការតស៊ូគ្នាយ៉ាងក្តៅគគុក រវាងក្រុមនយោបាយគូប្រជែង២ នឹងក្លាយជាចំណុចសំខាន់ នៅក្នុងសវនាការនេះ។

សវនាការចោទប្រកាន់នេះ នឹងក្លាយជាព្រឹត្តិការណ៍ដ៏មានហានិភ័យខ្ពស់ ដែលអាចបំផ្លាញក្តីសង្ឃឹមប្រធានាធិបតីឆ្នាំ២០២៨ របស់លោកស្រី Duterte ឬធ្វើឲ្យលោកស្រីជាបេក្ខជននាំមុខគេកាន់តែរឹងមាំ ក្នុងការបានទៅជំនួសគូប្រជែងដ៏ស្រួចស្រាវរបស់លោកស្រី គឺប្រធានាធិបតី លោក Ferdinand Marcos Jr ដែលត្រូវបានហាមឃាត់ដោយរដ្ឋធម្មនុញ្ញមិនឲ្យឈរឈ្មោះម្តងទៀត។

ដំណើរការនេះកើតឡើងស្របពេលមានភាពស្ថានភាពនយោបាយដ៏ច្របូកច្របល់ ពោលគឺត្រឹមតែប៉ុន្មានថ្ងៃបន្ទាប់ពីមាននូវភាពវឹកវរ និងការបាញ់ប្រហារ នៅសភាជាន់ខ្ពស់ និងការផ្លាស់ប្តូរដែលអាចកំណត់ជោគវាសនាភាពជាអ្នកដឹកនាំ ដែលបញ្ហាទាំង ២នេះ កើតចេញពីការលេចមុខជាថ្មីក្រោយលាក់ខ្លួនរបស់សមាជិកព្រឹទ្ធសភាគាំទ្រលោកស្រី Duterte ដែលត្រូវបានតុលាការព្រហ្មទណ្ឌអន្តរជាតិ (ICC) ចង់បានខ្លួន។

ខណៈពេលដែលសមាជិកបានត្រៀមបោះឆ្នោតចោទប្រកាន់ទម្លាក់តំណែងលោកស្រី Duterte នៅសភាជាន់ទាប កាលពីថ្ងៃទី១១ ខែឧសភា អ្នកនយោបាយ លោក Ronald «Bato» dela Rosa បានលេចមុខម្តងទៀត ដើម្បីធ្វើការបោះឆ្នោតដ៏សំខាន់មួយ នៅព្រឹទ្ធសភា ដើម្បីតែងតាំងអ្នកស្មោះត្រង់នឹងលោកស្រី Duterte គឺលោក Alan Peter Cayetano ជាប្រធានព្រឹទ្ធសភា ដែលធ្វើឲ្យលោក Cayetano ក្លាយជាប្រធាន សម្រាប់ដំណើរការកាត់ក្តីចោទប្រកាន់ទម្លាក់តំណែងនេះ។

គួរបញ្ជាក់ថា លោកស្រី Sara Duterte វ័យ ៤៧ឆ្នាំ ត្រូវបានចោទប្រកាន់ពីបទប្រើប្រាស់មូលនិធិសាធារណៈមិនត្រឹមត្រូវ មាននូវទ្រព្យសម្បត្តិដែលមិនអាចពន្យល់បាន និងគំរាមកំហែងអាយុជីវិតរបស់លោក Marcos ស្ត្រីទី១ និងអតីតប្រធានសភា។ ការចោទប្រកាន់ទាំងនោះ ត្រូវបានលោកស្រីបដិសេធ៕