សំណួរដ៏ស្មុគស្មាញ អំពីថា តើចក្រភពអង់គ្លេសគួរបន្ថយការឃ្លាតឆ្ងាយពីសហភាពអឺរ៉ុប (EU) រយៈពេល ១ទសវត្សរ៍ដែរ ឬអត់នោះ​ កំពុងលេចឡើង​ជាថ្មី ខណៈដែលគណបក្សការ​ងារ (Labour Party) ចាប់ផ្តើមគិត​គូរ​ពី​អនាគត នៅ​ពេល​គ្មាន​​នាយករដ្ឋមន្ត្រី លោក Keir Starmer។

ឥស្សរជនសំខាន់ៗ ២រូប បានលេចឡើង​ក្នុង​នាម​ជាគូប្រជែងដ៏មានសក្តានុពល បន្ទាប់ពីបាន​រិះគន់​ធ្ងន់​ៗ​ជាបន្តបន្ទាប់លើស្ថាប័ននយោបាយ ដែលបានធ្វើឲ្យ​ភាពជាអ្នកដឹកនាំរបស់លោក Starmer ស្ថិតក្នុងវិបត្តិ ហើយការពិចារណា​ពីការចូលរួមឡើង​វិញ​ជាមួយ EU កំពុងជ្រាប​ចូល​​ក្នុង​ការជជែកដេញដោល​។

លោក Wes Streeting ដែលបានលាលែងពីតំណែងក្នុង​រដ្ឋាភិបាលរបស់លោក Starmer ជារដ្ឋមន្ត្រីក្រសួងសុខាភិបាលកាលពីសប្តាហ៍មុន បានគាំទ្រការចូលរួមជាមួយប្លុកនេះឡើងវិញ នៅក្នុងសុន្ទរកថាមួយកាលពីថ្ងៃសៅរ៍ចុង​សប្ដាហ៍​កន្លង​មក​ ដោយនិយាយថា ការសម្រេចចិត្តចាកចេញនៅឆ្នាំ២០១៦ គឺជា «កំហុសដ៏មហន្តរាយ»។

នៅក្នុងបទសម្ភាសន៍មួយ ​កាលពីថ្ងៃសៅរ៍នោះដែរ បើ​ទោះ​បី​ជា​មិនសូវមានសំឡេងខ្លាំងក៏ដោយ​ ក៏លោក Andy Burnham អភិបាលក្រុង Greater Manchester ដែលមានគម្រោងឈរឈ្មោះជាបេក្ខជនរបស់គណបក្សការងារ​ នៅ​ក្នុងដំណើរការបោះឆ្នោតផ្ទៃក្នុង​ នៅថ្ងៃទី១៨​​ ខែមិថុនា ដើម្បី​ឲ្យ​លោក​អាច​ប្រឈម​ជាមួយ​លោក Starmer បាន​លើក​ឡើងពី​​ករណីចូលរួមឡើង​វិញ​ជាមួយ EU នេះ​ដែរ​។

ការអត្ថាធិប្បាយទាំងនេះកើតឡើងបន្ទាប់ពីមាន​ការបរាជ័យ​យ៉ាងធ្ងន់ធ្ងររបស់គណបក្សនេះ នៅក្នុងការបោះឆ្នោតមូល​ដ្ឋាន កាលពីដើមខែនេះ ដោយ​ចាញ់​គណបក្សស្ដាំ​និយម Reform U.K. និងគណបក្សឆ្វេងនិយម Green Party។ ដោយសារ​លទ្ធផលនោះ​ សមាជិកសភាគណបក្ស​ការងារ បានចង្អុលបង្ហាញពីការមិនពេញចិត្តរបស់អ្នកបោះឆ្នោត ចំពោះលោក Starmer ថា ជាកត្តារួមចំណែកមួយ ហើយចាប់តាំងពីពេលនោះមក សមាជិកសភាជាង ៩០​រូប បានអំពាវនាវជាសាធារណៈឲ្យ​លោក​នាយករដ្ឋមន្ត្រីលាលែងពីតំណែង​៕