មជ្ឈមណ្ឌលគ្រប់គ្រង និងបង្ការជំងឺ (CDC) របស់​សហរដ្ឋអាមេរិក កំពុងបង្កើនការឆ្លើយតបរបស់ខ្លួន ចំពោះការផ្ទុះឡើងនូវ​ជំងឺអេបូឡាដែលកំពុងបន្តមាន នៅក្នុងសាធារណរដ្ឋប្រជាធិបតេយ្យកុងហ្គោ និងអ៊ូហ្គង់ដា បន្ទាប់ពីអង្គការសុខភាពពិភពលោក (WHO) បានចាត់ទុកការផ្ទុះឡើងនេះថា ជាគ្រាអាសន្នសុខភាពសាធារណៈ។

កាល​ពី​ថ្ងៃអាទិត្យ (ទី១៧ ខែឧសភា ឆ្នាំ២០២៦) លោកវេជ្ជបណ្ឌិត Satish Pillai អ្នកគ្រប់គ្រងការ​ឆ្លើយហេតុការណ៍​ផ្ទុះ​ជំងឺអេបូឡារបស់ CDC បាននិយាយតាម​ទូរស័ព្ទជាមួយអ្នកសារព័ត៌មានថា ទីភ្នាក់ងារនេះមានគម្រោងដាក់ពង្រាយបុគ្គលិកបន្ថែមទៅ​កាន់​ប្រទេសដែលរងផលប៉ះពាល់ ហើយនឹងផ្តល់ការគាំទ្របច្ចេកទេស រួមទាំងការធ្វើតេស្តមន្ទីរពិសោធន៍ ការតាមដានទំនាក់ទំនង និងការឃ្លាំមើលតាមរយៈការិយាល័យប្រទេសរបស់ខ្លួន។ ស្ងាន័ន​ក៏បានធ្វើ​ឲ្យ​មជ្ឈមណ្ឌលឆ្លើយតបបន្ទាន់របស់ខ្លួនដំណើរការ​ផងដែរ​។

លោកវេជ្ជបណ្ឌិត Pillai បាននិយាយថា៖ «ហានិភ័យ នៅ​សហរដ្ឋអាមេរិក នៅតែមាន​កម្រិត​ទាបដដែល»​។ ការផ្ទុះឡើងនូវ​ជំងឺនេះបណ្តាលមកពីប្រភេទ​វីរុសអេបូឡា Bundibugyo ហើយមិនមានវ៉ាក់សាំង ឬការព្យាបាលដែលត្រូវបានអនុម័តនៅឡើយ​ទេ​។ លោក Pillai បានបន្ថែមថា អ្នកដែលឆ្លង អាចចម្លងជំងឺអេបូឡានៅពេលដែលពួកគេចេញ​រោគសញ្ញា។

គួរបញ្ជាក់ថា វិធានការ​ទាំងនេះកើតឡើងបន្ទាប់ពីអង្គការសុខភាពពិភពលោក បានប្រកាសពីការផ្ទុះឡើងនូវ​ជំងឺអេបូឡាជាគ្រាអាសន្នសុខភាពសាធារណៈ ដែលជាក្ដី​បារម្ភអន្តរជាតិ កាល​ពី​ថ្ងៃទី១៧ ខែឧសភា ដោយ​មិន​ប្រកាសជា​ «ភាព​អាសន្នខ្លាំង​បំផុត​នៃការ​​រាតត្បាត» ឡើយ​​ ខណៈពេលដែលខ្លួនកំពុងសម្លឹងដល់​ការកៀរគរការគាំទ្រប្រឆាំងនឹងប្រភេទ​វីរុសដ៏កម្រនេះ។ WHO បានបន្ថែម​ថា វីរុសនេះទំនងជាបានរីករាលដាលដោយមិនមានការរកឃើញនៅក្នុងតំបន់អស់រយៈពេលជាច្រើនសប្តាហ៍មកហើយ។

យោងតាម WHO បាន​ឲ្យ​ដឹង​ថា ប្រទេសកុងហ្គោបានរាយការណ៍ពីករណីឆ្លងចំនួន ៨ករណី សង្ស័យឆ្លងចំនួន ២៤៦ករណី និងសង្ស័យមានអ្នកស្លាប់ដោយ​ជំងឺ​នេះ​ចំនួន ៨០នាក់ នៅក្នុងខេត្ត Ituri។ អ៊ូហ្គង់ដាបានកត់ត្រាការឆ្លងចំនួន ២ករណី និងស្លាប់ម្នាក់ក្នុងចំណោមអ្នកធ្វើដំណើរមកពីកុងហ្គោ។ CDC មិនបានបញ្ជាក់ថា តើជនជាតិអាមេរិកនៅកុងហ្គោ បានប៉ះពាល់នឹងវីរុសនេះដែរ ឬអត់ឡើយ​៕