កងកម្លាំងអ៊ីស្រាអែល បាន​ និង​កំពុង​ស្ទាក់ចាប់កង​នាវាផ្ដល់​ជំនួយទៅកាន់តំបន់ហ្កាហ្សា នៅថ្ងៃចន្ទ (ទី១៨ ខែឧសភា ឆ្នាំ២០២៦) នេះ​ បន្ទាប់ពីក្រុម​នេះ​បានចេញដំណើរពីប្រទេសទួរគី កាលពីសប្តាហ៍មុន ដោយអ្នករៀបចំបាននិយាយថា នាវា ១គ្រឿងត្រូវបានបញ្ឈប់នៅភាគខាងលិចនៃប្រទេសស៊ីប។

កងនាវា​ផ្ដល់​ជំនួយ​មនុស្ស​ធម៌​សកល Global Sumud Flotilla បានបង្ហោះសារនៅលើបណ្ដាញ​សង្គម X ថា៖ «នាវាយោធាកំពុងស្ទាក់ចាប់កងនាវារបស់យើង ហើយកងកម្លាំង IDF (កង​កម្លាំង​ការពារ​ជាតិ​ កំពុងឡើងទៅ​លើទូកដំបូង​របស់យើង នៅ​កណ្ដាល​ថ្ងៃចែស​»។

ការ​បង្ហោះ​​នោះ​​បានបន្ថែម​​ថា៖ «យើងទាមទារឲ្យ​មាន​ការឆ្លងកាត់ប្រកប​ដោយសុវត្ថិភាព សម្រាប់បេសកកម្មមនុស្សធម៌ស្របច្បាប់ និងអហិង្សារបស់យើង។ រដ្ឋាភិបាលត្រូវតែចាត់វិធានការ​ ឥឡូវនេះ ដើម្បីបញ្ឈប់ទង្វើខុសច្បាប់ទាំងនេះ ឬចោរសមុទ្រ ដែលអ៊ីស្រាអែល​មាន​បំណងបន្ត​ការឡោមព័ទ្ធប្រល័យពូជសាសន៍លើតំបន់ហ្កាហ្សា។ ការធ្វើឱ្យអំពើហិង្សានៃការកាន់កាប់មានលក្ខណៈធម្មតាគឺជាការគំរាមកំហែងដល់យើងទាំងអស់គ្នា”។

នាវាប្រហែល ៥០​គ្រឿងបានចាកចេញពីភាគនិរតីនៃប្រទេសទួរគី កាល​ពី​ថ្ងៃព្រហស្បតិ៍ ជាផ្នែកមួយនៃកងនាវាផ្ដល់​ជំនួយ​មនុស្ស​ថម៌។ នៅថ្ងៃចន្ទនេះ​ អ៊ីស្រាអែលបានប្រាប់​ដោយ​ម៉ឺង​ម៉ាត់​ថា នឹងរារាំងនាវាទាំងនោះ។ ក្រសួងការបរទេសបានបង្ហោះនៅបណ្ដាញសង្គម X ថា៖ «អ៊ីស្រាអែលនឹងមិនអនុញ្ញាតឲ្យ​មានការរំលោភឡើយ លើការបិទផ្លូវទឹកស្របច្បាប់ លើតំបន់ហ្កាហ្សាទេ»។

គួរ​បញ្ជាក់​ថា យុទ្ធនាការ​ក្រុម​នាវា​ផ្ដល់​ជំនួយសកល​ Global Sumud Flotilla គឺជាគំនិតផ្តួចផ្តើមលើកទី៣ ក្នុងរយៈពេល ១ឆ្នាំដែលមានគោលបំណងទម្លាយ​ការបិទផ្លូវរបស់អ៊ីស្រាអែល ចំពោះ​តំបន់ហ្កាហ្សា ដែលបានជួប​ប្រទះ​ការខ្វះខាតស្បៀងអាហារ ទឹក ថ្នាំពេទ្យ និងប្រេងឥន្ធនៈយ៉ាងធ្ងន់ធ្ងរ ចាប់តាំងពីសង្គ្រាមអ៊ីស្រាអែល-ហាម៉ាស បានផ្ទុះឡើងក្នុងខែតុលា ឆ្នាំ២០២៣៕