​កូរ៉េខាងជើង៖ សារព័ត៌មាន​រដ្ឋ​កូរ៉េខាងជើង​បាន​និយាយ​កាលពី​ថ្ងៃ​សៅរ៍​ថា ប្រទេស​កូរ៉េខាងជើងបាន​ប្រារព្ធ​ខួបកំណើត ១១០ឆ្នាំ​ជូន​ស្ថាបនិក​លោក Kim Il Sung ដែល​ត្រូវជា​ជីតា​របស់​មេដឹកនាំ​លោក Kim Jong Un ដោយមាន​ក្បួន​ព្យុហយាត្រាស៊ីវិល និង​រាត្រី​ស្រមោល​ស​ដ៏​ធំ​នា​ពេល​ល្ងាច។

​យោង​តាម​សារព័ត៌មាន​រដ្ឋ​កូរ៉េខាងជើង ព្រឹត្តិការណ៍​នេះ​បាន​កើត​ឡើង​នៅ​ទីលាន​ចតុរង្គ​ដ៏​សំខាន់​របស់​ទីក្រុង Pyongyang កាលពី​ថ្ងៃ​សុក្រ​ដោយមាន​ក្រុម​អ្នក​សម្ដែង​សិល្បៈ​ច្រៀង​-​រាំ​រាប់​ពាន់​នាក់​បាន​ចូលរួម។ មេដឹកនាំ​កូរ៉េខាងជើង​លោក Kim Jong Un ក៏បាន​ចូលរួម​ក្បួន​ព្យុហយាត្រា​ស៊ីវិល​ដ៏​ធំ​នៅ​ក្នុង​ទីក្រុង Pyongyang រួម​ជាមួយ​ក្រុម​មន្ត្រី​ជាន់ខ្ពស់​ជាច្រើន​នាក់ ប៉ុន្តែ​ក្បួន​ព្យុហយាត្រា​ដ៏​ធំ​សម្បើម​នេះត្រូវ​បាន​ធ្វើឡើង​ ដោយមាន​តែ​កម្មវិធី​រាំច្រៀង​ប៉ុណ្ណោះ គ្មាន​ព្យុហយាត្រា​យោធា​ទេ​។​

​ទិវា​ព្រះអាទិត្យ​ "The Day of the Sun" គឺជា​ថ្ងៃ​ឈប់សម្រាក​ប្រចាំ​ឆ្នាំ​ដ៏​ធំ​បំផុត​របស់​ប្រទេស​កូរ៉េខាងជើង​។ លោក Kim ដែល​បាន​ទទួល​មរណភាព​កាលពី​ឆ្នាំ​១៩៩៤ គឺជា​ជីតា​បង្កើត​របស់​មេដឹកនាំ​កូរ៉េខាងជើង​បច្ចុប្បន្ន​លោក Kim Jong Un​។​ អតីត​ស្ថាបនិក​កូរ៉េខាងជើង​រូប​នេះ​បាន​កើត​នៅ​ថ្ងៃ​ទី​១៥ ​ខែ​មេសា ឆ្នាំ១៩១២​។ ប្រទេស​នេះ​តែង​ប្រារព្ធ​ខួបកំណើត​ជា​រៀង​រាល់​ឆ្នាំ​ដោយមាន​ពិធី​ដ៏​ធំ​បំផុត​រៀងរាល់​ខួប​ទី​៥ និង​ទី​១០៕​

អត្ថបទ៖ សុខមាន