នៅថ្ងៃចន្ទ (ទី១៨ ខែឧសភា ឆ្នាំ២០២៦) នេះ​ ប្រទេស​អាល្លឺម៉ង់បានព្រមានអំពីផលវិបាកសេដ្ឋកិច្ច ដោយសារ​សង្គ្រាម នៅអ៊ីរ៉ង់ និងការដាក់​ច្រកសមុទ្រ Hormuz ឲ្យ​ស្ថិត​នៅក្នុង​ហ៊ុម​ព័ទ្ធ ដោយ​ការ​លើក​ឡើង​នេះ​កើតមានមុនកិច្ចប្រជុំរដ្ឋមន្ត្រីហិរញ្ញវត្ថុរបស់​ប្រទេស​មាន​ឧស្សាហកម្ម​ឈាន​មុខ​គេទាំង៧ (G7) នៅទីក្រុងប៉ារីស ប្រទេស​បារាំង​។

អធិការបតីរង​ និងជារដ្ឋមន្ត្រីក្រសួងហិរញ្ញវត្ថុអាល្លឺម៉ង់ លោក Lars Klingbeil បាននិយាយមុនពេលចេញដំណើរទៅចូល​រួម​កិច្ចពិភាក្សាថា សង្គ្រាមនេះ គឺជា «ការគំរាមកំហែងធ្ងន់ធ្ងរដល់សេដ្ឋកិច្ចពិភពលោក» ហើយកំពុងបង្កការខូចខាតយ៉ាងធ្ងន់ធ្ងរដល់ការអភិវឌ្ឍសេដ្ឋកិច្ច។

ទីភ្នាក់ងារសារព័ត៌មានអាល្លឺម៉ង់ dpa បានដកស្រង់សម្តីរបស់លោក ដែល​បាន​និយាយ​ថា អ្វីគ្រប់យ៉ាងត្រូវតែសម្រេច​ឲ្យ​បាន​ ដើម្បី «បញ្ចប់សង្គ្រាមជាអចិន្ត្រៃយ៍» ធ្វើឲ្យ​តំបន់មានស្ថិរភាព និងធានាបាននូវសេរីភាព​នៃ​ការ​ធ្វើ​ចរាចរណ៍​តាម​ផ្លូវសមុទ្រ ហើយ «ដើម្បី​ធ្វើដូច្នេះ ផ្លូវរបស់យើង ក្នុងនាមជាប្រទេស​អឺរ៉ុប នៅតែច្បាស់លាស់ដដែល នោះគឺថា យើងផ្តល់អាទិភាពដល់កិច្ចសហប្រតិបត្តិការ ជាងការប្រឈមមុខដាក់គ្នា» ។

គួរបញ្ជាក់ថា នៅក្នុងកិច្ចប្រជុំរដ្ឋមន្ត្រីហិរញ្ញវត្ថុ G7 ដែលចាប់ផ្តើមនៅថ្ងៃចន្ទនេះ​ អ្នកចូលរួមត្រូវបានគេរំពឹងថា នឹងផ្តោតលើផលប៉ះពាល់សេដ្ឋកិច្ចនៃជម្លោះមជ្ឈិមបូព៌ា និងផលវិបាកដែលអាចកើតមាន ចំពោះ​ពាណិជ្ជកម្មពិភពលោក។ ច្រកសមុទ្រ Hormuz នៅតែជាផ្លូវដឹកជញ្ជូនដ៏សំខាន់បំផុតមួយរបស់ពិភពលោក សម្រាប់ពាណិជ្ជកម្មប្រេង និងឧស្ម័ន៕