ប្រទេសអ៊ីរ៉ង់បានប្រកាសនៅថ្ងៃចន្ទ (ទី១៨ ខែឧសភា ឆ្នាំ២០២៦) នេះ អំពីការបង្កើតស្ថាប័នថ្មីមួយ ដែលមានភារកិច្ចគ្រប់គ្រងច្រកសមុទ្រ Hormuz ស្របពេលមានភាពតានតឹងកាន់តែខ្លាំងឡើងៗ ជាមួយសហរដ្ឋអាមេរិក នៅផ្លូវទឹកយុទ្ធសាស្ត្រនេះ។

ក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ បានឲ្យដឹងនៅលើបណ្ដាញសង្គម X ថា អាជ្ញាធរថ្មីនេះ នឹងផ្តល់ «ព័ត៌មានថ្មីៗបន្ទាន់ ទាក់ទងនឹងប្រតិបត្តិការច្រកសមុទ្រ Hormuz និងការវិវត្តចុងក្រោយបំផុត»។ យ៉ាងណាក្ដី មិនមានព័ត៌មានលម្អិតបន្ថែមត្រូវបានចេញផ្សាយឡើយ ទាក់ទងនឹងរចនាសម្ព័ន្ធ អំណាច ឬការទទួលខុសត្រូវរបស់ស្ថាប័នថ្មីនេះ។

គួរបញ្ជាក់ថា ច្រកសមុទ្រ Hormuz គឺជាចំណុចតភ្ជាប់ថាមពលដ៏សំខាន់មួយរបស់ពិភពលោក ដែលភ្ជាប់ឈូងសមុទ្រនេះជាមួយឈូងសមុទ្រអូម៉ង់ និងទីផ្សារអន្តរជាតិ។ ការរំខាននៅក្នុងតំបន់នេះ បានជំរុញឲ្យមានក្ដីបារម្ភ អំពីការផ្គត់ផ្គង់ប្រេង ឥន្ធនៈ និងឧស្ម័នសកល ចាប់តាំងពីការចាប់ផ្តើមដំបូងនៃសង្គ្រាមអ៊ីរ៉ង់។

កាលពីថ្ងៃសៅរ៍ចុងសប្ដាហ៍កន្លងទៅ លោក Ebrahim Azizi ប្រធានគណៈកម្មាធិការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ បាននិយាយថា ប្រទេសរបស់លោក បានរៀបចំយន្តការគ្រប់គ្រងចរាចរណ៍ផ្លូវសមុទ្រតាមរយៈផ្លូវដែលបានកំណត់នៅចក្រសមុទ្រ Hormuz ហើយនឹងគិតថ្លៃ «សម្រាប់សេវាកម្មឯកទេស» ដែលត្រូវបានផ្តល់ជូនក្រោមប្រព័ន្ធនេះ៕