វិមានក្រឹមឡាំង បានលើក​ឡើង​នៅ​ថ្ងៃចន្ទ (ទី១៨ ខែឧសភា ឆ្នាំ២០២៦) នេះ​ថា ទំនាក់ទំនងណាមួយ រវាងប្រធានាធិបតីរុស្ស៊ី លោក Vladimir Putin និង​ប្រធានាធិបតីចិន លោក Xi Jinping នឹងបង្កើតសន្ទុះថ្មី សម្រាប់ការពង្រីកចំណង​ទាក់ទង​ទ្វេភាគីបន្ថែមទៀត។

អំឡុង​ពេល​ថ្លែងនៅឯ​សន្និសីទសារព័ត៌មានមួយ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រទេស​រុស្ស៊ីមាន «ការរំពឹងទុកខ្ពស់​» ពីដំណើរទស្សនកិច្ចរយៈពេល ២ថ្ងៃរបស់លោក Putin ទៅកាន់ប្រទេសចិន ដែលចាប់ផ្តើមនៅថ្ងៃអង្គារស្អែក​នេះ​។

លោកបានបន្ថែមថា បញ្ហាទាំងអស់នៅក្នុងរបៀបវារៈសេដ្ឋកិច្ចនៃទំនាក់ទំនងទីក្រុងមូស្គូ-ប៉េកាំង ត្រូវបានគេរំពឹងថា នឹងត្រូវបានពិភាក្សាអំឡុងដំណើរទស្សនកិច្ចនេះ។ លោក Peskov បានសង្កត់ធ្ងន់​ថា «ទំនាក់ទំនង រវាងរុស្ស៊ី និងចិន មានភាពចម្រុះណាស់» ដោយកិច្ចសហប្រតិបត្តិការបានផ្លាស់ប្តូរលើសពីពាណិជ្ជកម្ម និងសេដ្ឋកិច្ច ទៅជាវេជ្ជសាស្ត្រ វប្បធម៌ និងការអប់រំ។

ជាមួយ​គ្នានេះ ដោយបាន​អត្ថាធិប្បាយពី​សង្គ្រាម នៅអ៊ុយក្រែន លោក Peskov បាននិយាយថា វិមានក្រឹមឡាំងរំពឹងថា សហរដ្ឋអាមេរិក នឹងបន្តកិច្ចខិតខំប្រឹងប្រែងសម្របសម្រួលរបស់ខ្លួន ដើម្បីដោះស្រាយជម្លោះនេះ​។ លោកបានបន្ថែមថា៖ «ដំណើរការសន្តិភាពបច្ចុប្បន្ន ត្រូវបានផ្អាក។ យើងសង្ឃឹមថា វានឹងចាប់ផ្ដើម​ឡើងវិញនៅទីបំផុត»។

ជាង​នេះ​ទៀត​ លោកបានឲ្យ​ដឹង​ទៀត​ថា រុស្ស៊ីវាយប្រហារតែគោលដៅយោធា នៅអ៊ុយក្រែន ដោយចោទប្រកាន់ទីក្រុងគីវថា បានវាយប្រហារលើហេដ្ឋារចនាសម្ព័ន្ធស៊ីវិល នៅទូទាំងប្រទេសរុស្ស៊ី។ ហើយ​លោកបានបដិសេធការអះអាងរបស់ប្រធានាធិបតីអ៊ុយក្រែន លោក​ Volodymyr Zelenskyy ដែលថា រុស្ស៊ីកំពុងរៀបចំវាយប្រហារអ៊ុយក្រែន ឬប្រទេសសមាជិក​អង្គការណាតូ៕