មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បាននិយាយកាលពីថ្ងៃចន្ទ ​​​១៨ ​ឧសភា សប្ដាហ៍នេះ​ថា​ ប្រ​ទេសនេះកំពុងពង្រឹងការរឹតបន្តឹងការធ្វើដំណើរដើម្បីទប់ស្កាត់​ជំងឺអេបូឡាមិនឲ្យ​​​ហូរ​ចូលសហរដ្ឋអាមេរិក ស្របពេល​​​​មានការផ្ទុះឡើងជាបន្តបន្ទាប់នៅអាហ្វ្រិកខាងកើត និងអាហ្វ្រិកកណ្តាល។​

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទសប្ដាហ៍នេះថា​ លោកមានការព្រួយបារម្ភអំពីជំងឺអេបូឡា ប៉ុន្តែបានកត់សម្គាល់ថា មេរោគនេះនៅតែ​​កំពុង​​រាលដាល​ក្នុង​ទ្វីបអាហ្វ្រិកនៅឡើយ​​សម្រាប់ពេលនេះ ​ហើយ​បច្ចុប្បន្ន​នេះ​​​ ពុំទាន់មាន​នៅលើដីអាមេរិកទេ​។​

CDC បាននិយាយក្នុងសេចក្តីថ្លែងការណ៍មួយថា ខ្លួនកំពុងធ្វើការជាមួយក្រសួងសន្តិសុខមាតុភូមិ និងទីភ្នាក់ងារសហព័ន្ធផ្សេងទៀត ដើម្បីអនុវត្តវិធានការ​កាត់បន្ថយហានិភ័យនៃជំងឺអេបូឡាដែលបង្កឡើងដោយវីរុស​​ឈ្មោះ​ Bundibugyo ចូលសហរដ្ឋអាមេរិក។

វិធានការទាំងនេះរួមមាន ការត្រួតពិនិត្យសុខភាពសាធារណៈ និងការត្រួតពិនិត្យអ្នកដំណើរកាន់តែតឹងរ៉ឹង​ សម្រាប់បុគ្គលមកដល់ពីតំបន់ដែលរងផលប៉ះពាល់ដោយការផ្ទុះឡើងនៃជំងឺអេបូឡា​ ​ការ​​ហាម​ប្រាម​​សម្រាប់អ្នកកាន់លិខិតឆ្លងដែន​​មិនមែនជាជនជាតិអាមេរិក ​មិន​ឲ្យ​ចូលដីអាមេរិក ​ប្រសិន​បើ​​​ពួកគេ​​​បាន​ស្នាក់នៅ​​ក្នុង​​ប្រទេស​អ៊ូហ្គង់ដា សាធារណរដ្ឋប្រជាធិបតេយ្យកុងហ្គោ (DRC) ឬស៊ូដង់ខាងត្បូង​រយៈពេល ២១ ថ្ងៃមុន និងការសម្របសម្រួលជាមួយក្រុមហ៊ុនអាកាសចរណ៍ ដៃគូអន្តរជាតិ និងមន្ត្រីច្រកចូល ដើម្បីកំណត់អត្តសញ្ញាណ និងគ្រប់គ្រងអ្នកធ្វើដំណើរដែលអាចបានប៉ះពាល់នឹងមេរោគអេបូឡា។

ជាងនេះទៅទៀត CDC នឹងពង្រឹងសកម្មភាពឆ្លើយតបការពារសុខភាព​ ​តាមដានអ្នកប៉ះពាល់ សមត្ថភាពធ្វើតេស្តមន្ទីរពិសោធន៍ និងការត្រៀមលក្ខណៈសម្រាប់មន្ទីរពេទ្យទូទាំងប្រទេស និងបន្តដាក់ពង្រាយបុគ្គលិក CDC ដើម្បីគាំទ្រដល់កិច្ចខិតខំប្រឹងប្រែងទប់ស្កាត់ការផ្ទុះឡើងនៃជំងឺនៅក្នុងតំបន់ដែលរងផលប៉ះពាល់៕