ភ្នំពេញ៖ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានឲ្យដឹងថា នាឱកាសពិធីបុណ្យចូលឆ្នាំប្រពៃណីជាតិខ្មែររយៈពេល៣ថ្ងៃ និងថ្ងៃអាទិត្យចុងសប្តាហ៍១ថ្ងៃទៀត ចាប់ពីថ្ងៃទី១៤-១៧ ខែមេសា ឆ្នាំ២០២២ នៅទូទាំងប្រទេសទទួលបានភ្ញៀវទេសចរ សរុបចំនួនជាង ៥លាន១៧ម៉ឺននាក់។

អំឡុងពេលឈប់សម្រាកចូលឆ្នាំខ្មែររយៈពេល៣ថ្ងៃ គឺថ្ងៃទី១ មានទេសចរដើរកំសាន្ត​ទូទាំង​ប្រទេសចំនួន ៨៦២.៨៩៧នាក់ , សម្រាប់ថ្ងៃទី២មានចំនួន ១.៥៧៩.២៥១ នាក់ និងថ្ងៃទី៣មានចំនួន ២.១៤៨.១៧៨ នាក់ សរុប៣ថ្ងៃប្រមាណជាង៤លាននាក់។ ប៉ុន្តែដោយសារ១ថ្ងៃក្រោយចូលឆ្នាំចំ​ថ្ងៃ​អាទិត្យទេសចរបន្តដើរលេងមួយថ្ងៃទៀតគឺថ្ងៃទី១៧​ ខែមេសា មានទេសចរដើរកំសាន្ត​ចំនួន ៥៨៥.៤២៨ ​នាក់ទៀត ធ្វើអោយរយៈពេល៤ថ្ងៃនេះ​ មានទេសចរទាំងជាតិនិងអន្តរជាតិក្នុងស្រុក ដើរ​កំសាន្តមានចំនួន ៥.១៧៥.៧៥៤ នាក់ ក្នុងនោះ ភ្ញៀវជាតិ ៥.១៤០.៤៩៥ នាក់ និង​ភ្ញៀវបរទេស​ផ្ទៃក្នុង ៣៥.២៥៩ នាក់។

គោលដៅទេសចរណ៍សំខាន់ៗរយៈពេល៤ថ្ងៃនេះ រួមមាន៖

-ខេត្តបាត់ដំបង ៦៥៣.៨៩៦ នាក់, ខេត្តកំពង់ចាម ៥៤១.៩០០ នាក់, ខេត្តបន្ទាយមានជ័យ ៤៧១.១១៩ នាក់,ខេត្តសៀមរាប ៤៥៥.៩៨៤ នាក់,ខេត្តព្រៃវែង ៣៩៦.៣២៨ នាក់,ខេត្តកំពង់ស្ពឺ ៣៤៥.០១៨ នាក់,ខេត្តពោធិ៍សាត់ ៣៣៨.៩១៦ នាក់,ខេត្តកំពង់ឆ្នាំង ៣០០.៥៦១ នាក់,ខេត្តកំពត ២៨៤.៨៩៣ នាក់,ខេត្តព្រះសីហនុ ២៦៤.៣០៨ នាក់,រាជធានីភ្នំពេញ ២៤០.៤៦០ នាក់។

ឯកឧត្តមរដ្ឋមន្រ្តី ថោង ខុន បានបន្តថា ចំនួនភ្ញៀវទេសចរប្រមាណជាង ៥លាននាក់​ក្នុងរយៈពេល​៤ថ្ងៃនេះ គឺជាចំនួនមួយដ៏ច្រើនលើសពីការរំពឹងទុក និង​ជាចំនួនខ្ពស់មែនទែនចាប់តាំង​ពី​រាជ​រដ្ឋាភិបាល​បានប្រកាសបិទបញ្ចប់ព្រឹត្តិការណ៍​សហគមន៍​នាកំឡុងខែធ្នូ ​ឆ្នាំ២០២១កន្លងមក ខណៈដែល​ពិធីបុណ្យឆ្លងឆ្នាំសាកលកន្លងមក ​ភ្ញៀវសរុបមានប្រមាណ​ ២លាននាក់ ហើយ​ពិធី​បុណ្យ​ចូលឆ្នាំចិន -វៀតណាម ភ្ញៀវសរុបមានប្រមាណ ​៩៤ ម៉ឺននាក់។

ឯកឧត្តម បន្តទៀតថា ប្រជាពលរដ្ឋភាគច្រើន បានសម្រុកត្រលប់ចូលរាជធានីភ្នំពេញវិញចាប់តាំង​ពី​ពេលរសៀល ដែលបានធ្វើឲ្យចរាចរនៅតាមដងផ្លូវជាតិសំខាន់ៗ ​មានភាពកកកុញច្រើន។

ចរន្តភ្ញៀវទេសចរដ៏ច្រើននេះ​ បានបង្កើតជាផលប្រយោជន៍សេដ្ចកិច្ចដ៏ច្រើន​ទាំងនៅថ្នាក់ជាតិ និង​នៅតាមមូលដ្ឋាន។

តាម​បណ្តាសណ្ឋាគារ ប៊ូទីក ផ្ទះសំណាក់ ​និង​សេវាស្នាក់នៅផ្សេងៗស្ទើរគ្រប់ខេត្ត ដែល​មាន​លទ្ធភាពបើក​ អាជីវកម្មឡើងវិញនោះ ​បានទទួលការកក់ពេញស្ទើរ ​១០០%។

ទន្ទឹមនឹងនេះ បណ្តាភោជនីយដ្ឋាន និងអាហារដ្ឋាន ​ក៏មានភ្ញៀវចូលស្ទើរពេញៗក្នុងរយៈពេល​៣​ថ្ងៃនេះ ដែលមានភាពខុសគ្នាធៀប​នឹងពេលកំពុងមានវិបត្តិកូវីដ-១៩ខ្លាំង ដែលពួកគាត់ភាគច្រើន​បាន​រៀបចំ​ម្ហូប​អាហារដោយខ្លួនឯងសម្រាប់បរិភោគតាមផ្លូវ។

ការជឿជាក់លើភាពស៊ាំសហគមន៍​តាមរយៈការទទួលបានវ៉ាក់សាំង​ដូសពេញលេញ និង ដូស​បន្ត​បន្ទាប់ ​បានបង្កើតជាទំនុកចិត្តសម្រាប់ភ្ញៀវទេសចរ និងបងប្អូនប្រជាពលរដ្ឋក្នុងការដើរកម្សាន្ត​ពាស​ពេញ​ផ្ទៃប្រទេស​ ទោះបីជាពួកគាត់ភាគច្រើន ​បានជ្រើសជំរើសមិនពាក់ម៉ាស់។

ក្នុងន័យនេះ ​តាមការស្ទង់មតិនិងសង្កេតជាក់ស្តែង ​មិនមែនពួកគាត់មិនខ្លាចឆ្លងជំងឺកូវីដ-១៩ តែ​ពួក​គាត់​ពិតជាមានក្តីរីករាយដែលបានដើរកម្សាន្តក្នុង​ឱ​កាសចូលឆ្នាំនេះ ​ដែលខកខានរៀបចំ​រយៈពេល​២ឆ្នាំ ​ហើយក៏​ជឿជាក់​លើ​ប្រសិទ្ធភាព​នៃវ៉ាក់សាំង ​ហើយ​ម្យ៉ាងទៀតពួកគាត់ក៏មាន​ទំនុក​ទុកចិត្តថា ប្រសិន​បើមានការឆ្លង​ ជំងឺកូវីដ ​ក៏ពួកគាត់អាចព្យាបាលខ្លួនឯង នៅផ្ទះបានផង ដែរ៕ អត្ថបទ៖ រក្សា