កាលពី​ថ្ងៃចន្ទ (ទី១៨ ខែឧសភា ឆ្នាំ២០២៦) នគរបាល​បាន​ឲ្យ​ដឹង​ថា​ ខ្មាន់កាំភ្លើងវ័យជំទង់ ២នាក់ បានបើកការបាញ់ប្រហារ នៅមជ្ឈមណ្ឌលឥស្លាម ក្នុង​ទីក្រុង​ San Diego រដ្ឋ California សហរដ្ឋអាមេរិក​ ដោយបានសម្លាប់ឆ្មាំសន្តិសុខម្នាក់ និងបុរស ២នាក់ទៀត នៅខាងក្រៅវិហារឥស្លាម មុនពេលជនសង្ស័យត្រូវបានគេប្រទះ​ឃើញស្លាប់ ដែលទំនងជាមក​ពី​របួសដោយ​សារការ​បាញ់ខ្លួនឯង។

មេ​នគរបាល​ក្រុង​ San Diego លោក Scott Wahl បាននិយាយថា អាជ្ញាធរអនុវត្តច្បាប់ ក្នុងតំបន់ និង FBI (ការិយាល័យស៊ើបអង្កេតសហព័ន្ធ)​ កំពុងស៊ើបអង្កេតហេតុការណ៍​វាយប្រហារលើវិហារឥស្លាមធំបំផុត នៅតំបន់ San Diego នេះ ថា អាច​ជាឧក្រិដ្ឋកម្មស្អប់ខ្ពើម។

តែ​ជាយ៉ាងណាក្ដី​ មិនមានហេតុផលច្បាស់លាស់ ឬឧប្បត្តិហេតុដែលបង្កឲ្យ​មានអំពើហិង្សាដោយកាំភ្លើងនេះ ត្រូវបានអាជ្ញាធរលើក​ឡើង​ជាសាធារណៈនោះទេ៕