សេចក្ដី​ស្នើ​​ចោទប្រកាន់ទម្លាក់តំណែង​​មេដឹកនាំ​តៃវ៉ាន់ លោក William Lai ឬ​ Lai Ching-te មិន​ទទួល​បាន​ជោគ​ជ័យនោះទេ​ ​នៅថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ ដោយ​ដំណើរការ​នេះ​ក្លាយ​​​ជាការបោះឆ្នោតចោទប្រកាន់ទម្លាក់​តំណែង​មេដឹកនាំ​ជា​លើកដំបូងក្នុងប្រវត្តិសាស្ត្ររដ្ឋធម្មនុញ្ញរបស់កោះនេះ។ នេះបើយោងតាមប្រព័ន្ធផ្សព្វផ្សាយក្នុងស្រុក។

យោងតាមសារព័ត៌មាន​ Taipei Times បាន​ឲ្យ​ដឹង​ថា ញត្តិ​នេះ​មិន​អាច​ទទួល​បាន​សំឡេងភាគច្រើន ២ភាគ៣ ដែលត្រូវការនៅក្នុងអង្គនីតិបញ្ញត្តិ Yuan ដែលមាន ១១៣អាសនៈ ដោយមានសមាជិកសភាចំនួន ៥៦រូប បោះឆ្នោតគាំទ្រ និង ៥០​រូប ប្រឆាំង។ សមាជិកសភា ៧រូប មិនបានផ្ដល់​សំឡេង​ឆ្នោតនោះ​ទេ។

ដំណើរការចោទប្រកាន់ទម្លាក់តំណែង​នេះ​ត្រូវបានចាប់ផ្តើមដោយគណបក្សប្រឆាំង Kuomintang (KMT) និងគណបក្សប្រជាជនតៃវ៉ាន់ (Taiwan People's Party) បន្ទាប់ពីមេដឹកនាំ​រង​​កោះ​តៃវ៉ាន់​​ លោក​ Cho Jung-tai បានបដិសេធមិនចុះហត្ថលេខាលើវិសោធនកម្មគាំទ្រដោយគណបក្សប្រឆាំង ទាក់ទងនឹងច្បាប់បែងចែកប្រាក់ចំណូលរបស់រដ្ឋាភិបាល។

គួរបញ្ជាក់ថា គណបក្សប្រឆាំងបានប្រើប្រាស់សំឡេងរួម​ភាគច្រើនរបស់ពួកគេ នៅក្នុងសភា ដើម្បីចាប់ផ្តើម​នីតិវិធី​ចោទប្រកាន់ទម្លាក់​តំណែង ក្នុងខែធ្នូឆ្នាំមុន។ ការបោះឆ្នោតនេះបានកើតឡើង ១ថ្ងៃមុនខួបឆ្នាំ​ទី២ នៃ​ការ​កាន់​តំណែងរបស់​លោក Lai​។

យោងតាមច្បាប់រដ្ឋធម្មនុញ្ញរបស់កោះតៃវ៉ាន់ ការចោទប្រកាន់ទម្លាក់​តំណែង​តម្រូវឲ្យ​មានការយល់ព្រមពីសមាជិកសភាយ៉ាងហោចណាស់ ៧៦​រូប មុនពេលបញ្ជូនទៅតុលាការធម្មនុញ្ញ ដើម្បី​ធ្វើ​ការពិនិត្យបន្ថែម៕