ប្រធានាធិបតីហ្វីលីពីន លោក​ Ferdinand Marcos Jr បានលើក​ឡើង​ថា ប្រទេស​របស់លោក​ទំនងជាអាច​មាន​ការ​ជាប់ពាក់ព័ន្ធក្នុងជម្លោះណាមួយដែលអាចកើតឡើង​ លើកោះ​តៃវ៉ាន់ ដោយសារតែភាពនៅ​កៀក​គ្នា ដោយបញ្ជាក់ជាថ្មីនូវជំហរមួយដែលប្រឈម​នឹង​ការធ្វើឲ្យ​ទីក្រុងប៉េកាំងខឹងសម្បា។

ក្នុងបទសម្ភាសន៍ជាមួយប្រព័ន្ធផ្សព្វផ្សាយជប៉ុន នៅទីក្រុងម៉ានីល កាល​ពី​ថ្ងៃ​ចន្ទ (ទី១៨​ ខែឧសភា ឆ្នាំ២០២៦) នេះ​ លោក Marcos បាននិយាយថា៖ «នៅក្នុងប្រទេសហ្វីលីពីន យើងមិនមានជម្រើសទេ ពីព្រោះកោះ​តៃវ៉ាន់នៅជិតហ្វីលីពីនខ្លាំងណាស់ ហើយយើងមានជនជាតិហ្វីលីពីនជិត ២០០.០០០នាក់រស់នៅ និងធ្វើការនៅកោះ​តៃវ៉ាន់​»។

ការអត្ថាធិប្បាយរបស់មេដឹកនាំហ្វីលីពីនបែប​នេះ បានកើតឡើងមុនពេលមានដំណើរទស្សនកិច្ចផ្លូវរដ្ឋទៅកាន់ប្រទេសជប៉ុន នា​សប្តាហ៍ក្រោយ ជាកន្លែងដែលលោកនឹងជួបជាមួយនាយករដ្ឋមន្ត្រីជប៉ុន លោក​ស្រី​ Sanae Takaichi ដើម្បីពិភាក្សាអំពីកិច្ចសហប្រតិបត្តិការសន្តិសុខ។

នៅក្នុង​បទសម្ភាស៍​នោះ លោក Marcos បានបន្ថែមថា ហ្វីលីពីនមិនចង់ជាប់ពាក់ព័ន្ធក្នុងសង្គ្រាមណាមួយ នៅ​តៃវ៉ាន់ ដែលជាកោះស្វ័យ​គ្រប់គ្រងនោះទេ ប៉ុន្តែនឹងត្រូវបង្ខំចិត្តធ្វើ ដោយសារតែភូមិសាស្ត្ររបស់ប្រទេស​។

គួរបញ្ជាក់​ថា លោក Marcos ធ្លាប់បានធ្វើអត្ថាធិប្បាយស្រដៀងគ្នានេះកាល​ពី​មុន ពាក់​ព័ន្ធ​នឹង​កោះ​តៃវ៉ាន់ ដោយបានធ្វើឲ្យ​ទីក្រុងប៉េកាំងខឹងសម្បា នៅឆ្នាំ២០២៥ នៅពេលដែលលោកបាននិយាយថា សង្គ្រាមលើកោះតៃវ៉ាន់ «នឹងទាញឲ្យ​ប្រទេសហ្វីលីពីនចូលទៅក្នុងជម្លោះនោះ​»។

តែ​យ៉ាង​ណាក្ដី លោក Marcos បាននិយាយថា ប្រទេសហ្វីលីពីន ដែលមានជម្លោះទឹកដីជាមួយទីក្រុងប៉េកាំង នៅ​សមុទ្រចិនខាងត្បូង កំពុងបង្កើនការចូលរួមរបស់ខ្លួនជាមួយចិន ដើម្បីជួយរក្សាសន្តិភាព៕