យោងតាមប្រព័ន្ធផ្សព្វផ្សាយជា​ភាសាហេប្រឺ​ បាន​ឲ្យ​ដឹង​ថា នាយករដ្ឋមន្ត្រីអ៊ីស្រាអែល លោក Benjamin Netanyahu បានកោះប្រជុំគណៈរដ្ឋមន្ត្រីសន្តិសុខរបស់លោក កាលពី​ថ្ងៃចន្ទ (ទី១៨ ខែឧសភា ឆ្នាំ២០២៦) ដើម្បីពិភាក្សា អំពីលទ្ធភាពដែលអាចមាន​ការប្រយុទ្ធគ្នាថ្មី​ជាមួយអ៊ីរ៉ង់។

សារព័ត៌មាន​ចុះផ្សាយ​ប្រចាំថ្ងៃ Israel Hayom បានឲ្យដឹង​ថា កិច្ចប្រជុំនេះបានកើតឡើងបន្ទាប់ពីលោក Netanyahu បានបើកការពិភាក្សាគណៈរដ្ឋមន្ត្រីស្រដៀងគ្នានេះ កាលពី​ថ្ងៃអាទិត្យចុង​សប្ដាហ៍កន្លង​មក​ បន្ទាប់ពីបាន​សន្ទនាតាម​ទូរស័ព្ទជាមួយប្រធានាធិបតីអាមេរិក លោក Donald Trump ដើម្បីសម្របសម្រួល «ជំហានបន្ទាប់» ទាក់ទងនឹងអ៊ីរ៉ង់។

សារព័ត៌មាន​នេះ បានដកស្រង់ប្រភពមួយដែលដឹង​ពី​ការពិភាក្សាជាមួយ​សហរដ្ឋអាមេរិក ដែល​បាន​និយាយថា ការវាយប្រហារថ្មីរបស់អាមេរិក លើអ៊ីរ៉ង់ គឺ «មិនមែនជាសំណួរថា តើកើត​ឡើង​ ឬអត់នោះទេ ប៉ុន្តែគឺ​នៅពេលណា»។ យោងតាមប្រភពដដែល​នេះ​ បាន​ឲ្យ​ដឹង​ទៀត​ថា ការវាយប្រហារដែលបានគ្រោងទុកណាមួយ នឹងខុសពីប្រតិបត្តិការមុនៗ ហើយអាចកំណត់គោលដៅទីតាំងដែលលោក Trump ធ្លាប់បានជៀសវាងមិន​វាយប្រហារ។

សារព៏ត៌មាន​នេះ ក៏បានដកស្រង់ប្រភពសន្តិសុខអ៊ីស្រាអែលដែលបាន​និយាយ​ក្នុង​លក្ខខណ្ឌ​មិនបញ្ចេញឈ្មោះ ដែល​បាន​ប្រាប់​ថា ការរៀបចំ និងវិធានការ ត្រូវបានត្រៀម​រួចហើយ សម្រាប់​ការ​រំពឹងទុកពី​ការប្រយុទ្ធគ្នាជុំមួយ​ទៀត ជាមួយអ៊ីរ៉ង់៕