ភ្នំពេញ៖ ពិធីបុណ្យចូលឆ្នាំប្រពៃណីជាតិខ្មែរ ឆ្នាំ២០២២ បានបញ្ចប់ទៅ ដោយផ្ដល់នូវភាពសប្បាយរីករាយស្នាមញញឹម ជូនប្រជាពលរដ្ឋកម្ពុជា រាប់បញ្ចូលទាំងជនបរទេស ដែលដើរកំសាន្តក្នុងថ្ងៃនេះផងដែរ។

ជាក់ស្ដែងក្នុងកំឡុងថ្ងៃឈប់ម្រាកពិធីបុណ្យចូលឆ្នាំប្រពៃណីជាតិខ្មែរកន្លងទៅនេះ ក្រសួង​ទេសចរណ៍​បានបង្ហាញនូវទិន្នន័យការដើរកំសាន្តជាច្រើនលាននាក់។

ការរៀបចំពិធីបុណ្យចូលឆ្នាំប្រពៃណីជាតិខ្មែរ ឆ្នាំ២០២២ បានបិទបញ្ចប់ដោយជោគជ័យ ខណៈដែល​ភ្ញៀវទេសចរជាច្រើន​លាននាក់​បានធ្វើដំណើរកំសាន្ត ​ដោយ​បន្សល់​ទុកនូវ​ស្នាម​ញញឹម ភាព​ពេញចិត្ត សប្បាយរីករាយ ​សម្រាប់​ប្រជាពលរដ្ឋ ខណៈដែល​កម្ពុជា​បានផ្អាក​ការរៀបចំ​ពិធីនេះ​រយៈពេល២ឆ្នាំមកហើយ។

សម្រាប់ថ្ងៃចូលឆ្នាំកន្លងទៅនេះ ​លោក Andy មកពីប្រទេស Ethopia លើកឡើងថា​ ថ្ងៃចូលឆ្នាំខ្មែរ គឺលោកបានធ្វើដំណើរទៅលេងខេត្តសៀមរាប។ ​វាជាបទពិសោធន៍ដ៏អស្ចារ្យ ដែលផ្ដល់នូវភាព​សប្បាយ​រីករាយ​ជាខ្លាំងសម្រាប់គាត់។

ចំពោះប្រជាពលរដ្ឋកម្ពុជា ​ពួកគាត់ក៏លើកឡើងដែរថា ​ចូលឆ្នាំខ្មែរលើកនេះ​ពិតជាសប្បាយខ្លាំង ដោយ​មានការជួបជុំ ​ការធ្វើដំណើរកំសាន្តជាច្រើន។ ពួកគាត់សូមអរគុណដល់ប្រមុខថ្នាក់ដឹកនាំ ដែល​អនុញ្ញាតឱ្យមានការរៀបចំពីធីបុណ្យចូលឆ្នាំប្រពៃណីជាតិខ្មែរ។ ជាពិសេសអរគុណចំពោះការចាក់វ៉ាក់សាំងជូនប្រជាពលរដ្ឋ ព្រោះបើគ្មានការចាក់វ៉ាក់សាំង​បាន​ទូលំទូលាយ​នោះទេ ​ច្បាស់ជាមិនអាចមានការរៀបចំពិធីបុណ្យចូលឆ្នាំប្រពៃណីជាតិខ្មែរនោះទេ។

ការរៀបចំប្រារព្ធ​ពិធីចូលឆ្នាំប្រពៃណីជាតិខ្មែរឆ្នាំ ​២០២២នេះ ​តាមរាជធានី-ខេត្ត ជាច្រើនក៏បាន​រៀបចំ​កម្មវិធីសង្រ្កាន្ត ​និងតុបតែងយ៉ាងស្រស់ស្អាត​ ដើម្បីផ្ដល់ភាពសប្បាយជូនប្រជាពលរដ្ឋ។ ការរៀបចំកម្មវិធីចូលឆ្នាំប្រពៃណីជាតិខ្មែរនេះ ​ក៏ស្របពេលដែលកម្ពុជា ​មានករណីឆ្លងកូវីដធ្លាក់ចុះ មកត្រឹម ​២ខ្ទង់ប្រចាំថ្ងៃ និងស្របពេលដែលកម្ពុជាស​ម្រេច​ជោគ​ជ័យ​ធំធេង​លើ​ការចាក់វ៉ាក់​សាំង​ជូនប្រជាពលរដ្ឋ៕ អត្ថបទ៖ គឹមហុក