មេដឹកនាំ​កូរ៉េខាងត្បូង និងជប៉ុន បាន​ឲ្យ​ដឹង​ថា ប្រទេស​ទាំង២ នៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ បានព្រមព្រៀងគ្នាពង្រីកកិច្ចសហប្រតិបត្តិការ លើការផ្គត់ផ្គង់ឧស្ម័នធម្មជាតិរាវ (LNG) និងប្រេងឆៅ ក្នុង​នោះ​រួមទាំងការរៀបចំស្តុកទុក និងការផ្លាស់ប្តូរផលិតផលប្រេងឥន្ធនៈ​ផង​ដែរ​។

បន្ទាប់ពីមាន​កិច្ចប្រជុំមួយនៅស្រុកកំណើតរបស់មេដឹកនាំ​កូរ៉េខាងត្បូង គឺទីក្រុង​ Andong លោកប្រធានាធិបតី Lee Jae Myung និងលោកស្រី​នាយករដ្ឋមន្ត្រី Sanae Takaichi បានលើកឡើង​ថា ភាគី​ទាំង២ នឹងពង្រឹងការសម្របសម្រួល ដើម្បី​ធ្វើឲ្យខ្សែច្រវាក់​ផ្គត់ផ្គង់ថាមពលមានស្ថិរ​ភាព និងពង្រីកកិច្ចសហប្រតិបត្តិការជាមួយដៃគូអាស៊ីផ្សេងទៀត ខណៈដែលការរំខានដល់ការផ្គត់ផ្គង់ ដោយសារ​សង្គ្រាម នៅឈូងសមុទ្រ បានធ្វើឲ្យសេដ្ឋកិច្ចដែលពឹងផ្អែកលើការនាំចូលរបស់ប្រទេស​ទាំង២ រងផលប៉ះពាល់។

នៅក្នុងសេចក្តីថ្លែងការណ៍សារព័ត៌មានរួមគ្នាមួយ លោក Lee បានមានប្រសាសន៍ថា៖ «អស្ថិរភាពថ្មីៗនេះនៅក្នុងខ្សែច្រវាក់ផ្គត់ផ្គង់ និងទីផ្សារថាមពល ដែលបណ្តាលមកពីស្ថានភាព នៅតំបន់​មជ្ឈិមបូព៌ា បានគូសបញ្ជាក់បន្ថែមទៀត អំពីតម្រូវការសម្រាប់កិច្ចសហប្រតិបត្តិការយ៉ាងជិតស្និទ្ធ រវាងប្រទេសយើងទាំង២»។

ចំណែក​លោកស្រី​ Takaichi បានបញ្ជាក់​ថា លោកស្រី និង​លោក Lee ក៏បានដាក់ចេញនូវគំនិតផ្តួចផ្តើមទ្វេភាគី ដែលផ្តោតលើការពង្រឹងភាពធន់នៃការផ្គត់ផ្គង់ថាមពល រួមទាំងការបង្កើនការ​បម្រុងទុក នៅក្នុងតំបន់ឥណ្ឌូ-ប៉ាស៊ីហ្វិក និង «ការវាយតម្លៃសន្តិសុខថាមពល តាមរយៈវិធានការនានា ដូចជាប្រតិបត្តិការផ្លាស់ប្តូរទៅវិញទៅមក សម្រាប់ប្រេងឆៅ ផលិតផលប្រេងឥន្ធនៈ និងឧស្ម័នធម្មជាតិរាវ (LNG) ផង​ដែរ​។

ជាង​នេះទៀទ មេដឹកនាំទាំង២ ក៏បានបញ្ជាក់ជាថ្មីនូវការសម្របសម្រួលសន្តិសុខកាន់តែរឹងមាំ ក្នុង​នោះ​រួមមាន​ទាំងកិច្ចសហប្រតិបត្តិការត្រីភាគីជាមួយសហរដ្ឋអាមេរិក ខណៈពេលដែលប្រទេស​ទាំង​២ ត្រូវមាន​បញ្ហាប្រឈមរួមគ្នា ដែល​រួមមាន​បញ្ហាកូរ៉េខាងជើង និងភាពតានតឹងក្នុងតំបន់កាន់តែទូលំទូលាយផង​ដែរ​៕