នគរបាលអេស្ប៉ាញ បានឲ្យ​ដឹង​នៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ថា ពួកគេបានឃុំខ្លួនបុរសអាយុ ២៥ឆ្នាំម្នាក់ ដែលត្រូវបានចោទប្រកាន់ថា បានសម្លាប់ឪពុកម្តាយរបស់ខ្លួន និងធ្វើឲ្យ​មនុស្ស ៤នាក់ទៀតរងរបួស ក្នុង​នោះ​រួមមាន​ទាំងកូនប្រុសរបស់គេ​ផងដែរ នៅ​ក្នុងហេតុ​ការណ៍​បាញ់ប្រហារមួយ នា​ពេល​យប់ នៅទីក្រុង El Ejido ភាគខាងត្បូង ក្នុង​ខេត្ត Almeria។

កងកម្លាំង Guardia Civil បានឲ្យ​ដឹង​នៅក្នុងសេចក្តីថ្លែងការណ៍មួយថា អ្នករងរបួសទាំង ៤នាក់ត្រូវនោះ​បានបញ្ជូនទៅមន្ទីរពេទ្យ ហើយ​កំពុង​ស្ថិតក្នុងស្ថានភាពធ្ងន់ធ្ងរ។ រួម​ជាមួយ​កូនប្រុសរបស់ជនសង្ស័យ អ្នករងរបួស មានបុរសម្នាក់ ស្ត្រីម្នាក់ និងអនីតិជនម្នាក់ទៀត។

សេចក្តីថ្លែងការណ៍បានបន្ថែម​ថា ការបាញ់ប្រហារនេះត្រូវបានរាយការណ៍ជាលើកដំបូង ក្រោយ​ម៉ោង ១១យប់ ម៉ោង​ក្នុង​ស្រុក (ត្រូវ​នឹង​ម៉ោង ២១ ម៉ោង​កសល​) កាល​ពី​ថ្ងៃចន្ទ។ អង្គភាពជំនាញបានចាប់ខ្លួនជនសង្ស័យ នៅម៉ោងប្រហែល ៤ព្រឹកថ្ងៃអង្គារ។

នគរបាល​កំពុងស៊ើបអង្កេតពីមូលហេតុនាំ​ឲ្យមាន​ការបាញ់ប្រហារនេះ​ ដែលពួកគេនិយាយថា ដំបូងឡើយហាក់ដូចជាការ​មាន​អំពើហិង្សាក្នុងគ្រួសារ ក៏ដូចជាប្រភពដើមនៃអាវុធដែលជន​ល្មើស​បានប្រើប្រាស់​ ព្រោះជនសង្ស័យមិនមានអាជ្ញាប័ណ្ណកាន់កាប់​កាំភ្លើងទេ​៕