បាត់ដំបង៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលត្រូវបានបញ្ចប់ ក្រុមគ្រូពេទ្យខេត្តបាត់ដំបង បានចាក់វ៉ាក់សាំងការពារជំងឺកូវីដ១៩ ជូនដល់ពលរដ្ឋដែលចេញដើរលេងកម្សាន្តបានជាង ១ ៥០០នាក់។

យោងតាមរបាយការណ៍របស់មន្ទីរសុខាភិបាលខេត្តបាត់ដំបង បានឱ្យដឹងថា​ ក្នុងកម្មវិធីសង្រ្កាន្ត បាត់ដំបង ចាប់ពីថ្ងៃទី ១៣-១៧ ខែមេសា ឆ្នាំ២០២២ ក្រុមគ្រូពេទ្យ​បាន​ចាក់វ៉ាក់សាំង​បង្ការ​ជំងឺកូវីដ១៩ ​ជូនដល់ប្រជាពលរដ្ឋបានចំនួន ១ ៥៧៧នាក់ ។

ក្នុងរយៈពេលដូចគ្នានេះដែរ ​ក្រុមគ្រូពេទ្យក៏បានយកសំណាកវត្ថុវិភាគកូវីដ១៩ លើ​ប្រជាពលរដ្ឋ​ចំនួន ៣៣៤នាក់ ក្នុងនោះ​បានរកឃើញវិជ្ជមានកូវីដ១៩​ ត្រឹមតែ២​នាក់​ប៉ុណ្ណោះ។

គិតត្រឹមថ្ងៃទី១៧ ខែមេសា ឆ្នាំ២០២២ ប្រជាពលរដ្ឋក្នុងខេត្តបាត់ដំបង អាយុចាប់ពី១៨ឆ្នាំឡើង​ទៅ​ជាង ២៦ ០០០នាក់​ បានចាក់វ៉ាក់សាំងដូសជំរុញទី៤ ក្នុងចំណោម​ពលរដ្ឋ​គោលដៅ​ជាង ៨០ម៉ឺន​នាក់។

ចំណែកកុមារ និងយុវវ័យ អាយុចាប់ពី៥ឆ្នាំ ដល់ក្រោម១៨ឆ្នាំ ប្រមាណជិត ២០ម៉ឺននាក់បានចាក់​ដូស​ជំរុញទី៣ ខណៈកុមារ អាយុចាប់ពី៣ឆ្នាំដល់ក្រោម៥ឆ្នាំ ជិត១ម៉ឺននាក់ បានចាក់វ៉ាក់សាំង​ដូសទី២រួចរាល់៕