អង្គការទេសន្តរប្រវេសន៍អន្តរជាតិ(IOM) បាននិយាយកាលពីថ្ងៃចន្ទថា ជនអន្តោប្រវេសន៍សរុបចំនួន ៧៤១ នាក់ ត្រូវបានបញ្ជូនត្រឡប់ទៅប្រទេសលីប៊ីវិញ ចាប់ពីថ្ងៃទី ១០ ដល់ថ្ងៃទី ១៦ ខែឧសភា បន្ទាប់ពីត្រូវបានស្ទាក់ចាប់នៅសមុទ្រ ខណៈពេលកំពុងព្យាយាមទៅដល់ឆ្នេរសមុទ្រអឺរ៉ុប។

អង្គការនេះបាននិយាយថា ជនអន្តោប្រវេសន៍ទាំងនោះ ត្រូវបានចុះពីលើនាវានៅក្នុងទីក្រុងឆ្នេរសមុទ្រជាច្រើន នៅពេលពួកគេត្រឡប់ទៅវិញ ប៉ុន្តែមិនបានផ្តល់ព័ត៌មានលម្អិតអំពីសញ្ជាតិ ឬអាយុរបស់ពួកគេទេ។

ការស្ទាក់ចាប់បានបង្ហាញពីកិច្ចខិតខំប្រឹងប្រែងជាបន្តបន្ទាប់ ក្នុងការធ្វើទេសន្តរប្រវេសន៍មិនទៀងទាត់តាមបណ្តោយផ្លូវសមុទ្រមេឌីទែរ៉ាណេភាគកណ្តាល ដែលជាផ្លូវធ្វើដំណើរដ៏គ្រោះថ្នាក់បំផុតមួយរបស់ពិភពលោក។ បណ្តាអង្គការអន្តរជាតិបានព្រមានម្តងហើយម្តងទៀតអំពីហានិភ័យដែលជនអន្តោប្រវេសន៍ប្រឈមក្នុងអំឡុងពេលធ្វើដំណើរទាំងនេះ។

ចាប់តាំងពីដើមឆ្នាំ ២០២៦ មក ជនអន្តោប្រវេសន៍ចំនួន ៦.៨១១ នាក់ ត្រូវបានស្ទាក់ចាប់បាន ហើយបានបញ្ជូនត្រឡប់ទៅប្រទេសលីប៊ីវិញ ខណៈដែល ៨២២ នាក់ ត្រូវបានរាយការណ៍ថា ស្លាប់ ឬបាត់ខ្លួននៅលើផ្លូវសមុទ្រមេឌីទែរ៉ាណេភាគកណ្តាល គិតត្រឹមថ្ងៃទី ១៦ ខែឧសភា។ នេះបើយោងតាមអង្គការ IOM៕